दिवे घाटावर जीवघेणा स्टंट

सासवड, ता. १३: रविवारची सुट्टी आणि दिवे घाटाचं विहंगम दृश्य... हे समीकरण पुणे आणि आसपासच्या पर्यटकांना नेहमीच खुणावतं. आजही घाटमाथ्यावर पर्यटकांची गर्दी होती; मस्तानी तलावाचं नयनरम्य रूप आणि आजूबाजूच्या शेतीचं मनोहारी दर्शन घेण्यासाठी अनेकजण इथे थांबले होते. पण याचवेळी चार तरुणांनी केवळ स्वतःचा जीवच धोक्यात घातला नाही, तर इतरांसाठीही मोठी आपत्ती निर्माण केली.
तरुणांनी चक्क आपली दुचाकी घेऊन घाटमाथ्यावरील डोंगराच्या अगदी काठावर उभी करून ते मोबाईलमध्ये फोटो काढत होते. हा प्रकार पाहून घाटात रस्त्यावरील उपस्थितांच्या काळजाचा ठोका चुकला, कारण ज्या ठिकाणी दुचाकी थांबवली होती, त्या जमिनीला स्पष्ट तडे गेले आहेत. अशा ठिकाणी दुचाकी घेऊन जाणं म्हणजे थेट दरड कोसळून खाली रस्त्यावर कोसळण्यासारखे आहे. हे केवळ त्यांच्यासाठीच नव्हे, तर रस्त्यावरून ये-जा करणाऱ्या इतर पर्यटकांच्याही जिवावर बेतणारं होतं.
या घटनेमुळे प्रशासनाच्या दुर्लक्षावर गंभीर प्रश्नचिन्ह निर्माण झालं आहे. घाटातील रस्ता रुंदीकरणामुळे यंदाच्या पालखी सोहळ्यात भाविकांना आणि छायाचित्रकारांनाही घाटात जाण्यास बंदी होती. मात्र, आता काहीजण दुचाकी घेऊन थेट घाटाच्या कड्याजवळ जात असतानाही याकडे कोणाचं लक्ष नाही. सध्या दिवे घाटाच्या रुंदीकरणाचं काम युद्धपातळीवर सुरू आहे. अशा परिस्थितीत, पोलिसांनी तातडीने या धोकादायक ठिकाणी जाण्यावर निर्बंध घालणं अत्यंत गरजेचं आहे. त्याचबरोबर, पर्यटकांनीही स्वतःच्या सुरक्षिततेची काळजी घेऊन असे जीवघेणे प्रकार टाळणे आवश्यक आहे.

05265