संजय जगताप यांचा आज भाजपमध्ये पक्षप्रवेश

सासवड, ता. १५ : पुरंदर, हवेलीचे माजी आमदार संजय जगताप यांच्या भाजप प्रवेशामुळे पुणे जिल्हा ग्रामीणमध्ये भाजपची ताकद वाढणार आहे. त्यांच्या प्रवेशामुळे भाजप कार्यकर्त्यांमध्ये उत्साहाचे वातावरण आहे. सासवड येथील पालखी तळावर बुधवारी (दि.१६) प्रदेशाध्यक्ष रवींद्र चव्हाण यांच्या उपस्थितीत हा भव्य पक्षप्रवेश होणार असल्याची माहिती पुणे जिल्हा (दक्षिण) भाजपचे अध्यक्ष शेखर वढणे यांनी दिली.
संजय जगताप यांनी काँग्रेसच्या जिल्हाध्यक्षपदाची जबाबदारी सांभाळली असून त्यांचा संपूर्ण पुणे जिल्ह्यात मोठा संपर्क आहे. त्यांचे पुणे जिल्ह्यात सहकारी संस्था, शिक्षण संस्था, सामाजिक संस्थांच्या माध्यमातून मोठे काम आहे. याचा फायदा भाजपला या भागात बळकटी आणण्यासाठी होणार आहे. बुधवारी पक्षप्रवेशासाठी प्रदेश सरचिटणीस राजेश पांडे, भाजप मुख्यालय प्रभारी रवी अनासपुरे यांच्यासह भाजपचे पदाधिकारी व कार्यकर्ते उपस्थित राहणार असल्याचे वढणे यांनी सांगितले.
आतापर्यंत मुंबई येथे विविध भागांतील नेत्यांचे भाजप प्रवेश झाले आहेत. मात्र, संजय जगताप यांचा पक्षप्रवेश हा स्थानिक भागात होणारा पहिलाच प्रवेश असल्याचे जिल्हाध्यक्ष शेखर वढणे यांनी सांगितले. या मुळे या प्रवेशाला विशेष महत्त्व प्राप्त झाले असल्याचेही त्यांनी स्पष्ट केले.