तात्पुरत्या दुरुस्त्यांऐवजी नव्याने सिटी सर्व्हे करा

सासवड, ता. २३ : वनपुरी (ता. पुरंदर) गावात बुधवारी (ता. २३) भूमी अभिलेख विभागाच्या वतीने आयोजित केलेला सिटी सर्व्हे कॅम्प ग्रामस्थांच्या मागणीमुळे रद्द करण्यात आला आहे. सन २०२२- २३ मध्ये ड्रोनद्वारे करण्यात आलेल्या सिटी सर्व्हेमध्ये मोठ्या प्रमाणात चुका असल्याचा आणि अनेक ठिकाणी चुकीच्या नोंदी केल्याचा आरोप करत ग्रामस्थांनी तात्पुरत्या दुरुस्त्यांऐवजी नव्याने संपूर्ण सर्व्हे करण्याची मागणी निवेदनातून केली आहे.
भूमी अभिलेख विभागाने सन २०२२-२३ मध्ये केलेल्या ड्रोन सर्व्हेनंतर तयार केलेल्या सनदांमध्ये अनेक त्रुटी असून, नागरिकांची घरे असूनही त्यांची नोंद ग्रामपंचायत अशी केली आहे, तर काही मोकळ्या जागांवर ठराविक लोकांची जाणीवपूर्वक नोंद केल्याचा आरोपही निवेदनातून करण्यात आला. या चुकांबद्दल सामाजिक कार्यकर्ते सुनील गायकवाड यांच्यासह अनेक ग्रामस्थांनी वेळोवेळी भूमी अभिलेख विभाग, जिल्हाधिकारी कार्यालय आणि आमदार विजय शिवतारे यांच्याकडे निवेदने दिली होती.
बुधवारी (ता. २३) झालेल्या कॅम्पमध्ये भूमी अभिलेख विभागाचे शिरस्तदार संजय पवार, परिरक्षण भूमापक विकास ढेकळे, भूकरमापक विष्णू सोनटक्के, दप्तरबंद राजेंद्र चिंचकर उपस्थित होते. त्यांनी तक्रारी लेखी स्वरूपात देण्यास सांगितले असता, ग्रामस्थांनी तात्पुरत्या दुरुस्त्यांऐवजी नव्याने सर्व्हे करण्याची मागणी लावून धरली. तसेच ८-अ उताऱ्यावरील क्षेत्राप्रमाणेच नोंदी असाव्यात आणि २००० पूर्वीच्या ८-अ वरील नोंदी विचारात घ्याव्यात, अशीही मागणी ग्रामस्थांनी केली आहे.
याप्रसंगी सुनील गायकवाड, पोलिस पाटील नवनाथ कुंभारकर, माजी सरपंच दिगंबर महामुनी, संजय कुंभारकर, सीताराम कुंभारकर, अशोक गद्रे, महादेव कुंभारकर, दिलीप खुरपे, महादेव रूढ, राजेंद्र महामुनी, विलास कुंभारकर, विश्वनाथ कुंभारकर, ग्रामसेवक संपत भोरडे यांच्यासह ग्रामस्थ उपस्थित होते. ग्रामस्थांच्या मागणीनुसार भूमी अभिलेख विभागाने उपसरपंच सुजित कुंभारकर, सदस्य हरिश्चंद्र राऊत आणि प्रताप कुंभारकर यांच्या उपस्थितीत पंचनामा करून कॅम्प रद्द केला आहे.
आमदार विजय शिवतारे यांनीही भूमी अभिलेख विभागाच्या अधिकाऱ्यांशी फोनवरून संपर्क साधून तात्पुरत्या कॅम्पऐवजी नव्याने सर्व्हे करण्याच्या सूचना दिल्या आहेत. याबाबत ते महसूलमंत्री चंद्रशेखर बावनकुळे यांच्याशी चर्चा करणार असल्याचेही त्यांनी सांगितले.