सावकारी जाचाला कंटाळून शेतकऱ्याकडून विष प्राशन

सासवड, ता. २८ : भिवरी (ता. पुरंदर) येथील एका शेतकऱ्याने सावकारांच्या जाचाला कंटाळून विष प्राशन केल्याची घटना समोर आली आहे. शंकर नारायण लोणकर (वय ५४, रा. भिवरी, ता. पुरंदर) असे शेतकऱ्याचे नाव आहे.
लोणकर यांनी दिलेल्या फिर्यादीनुसार, विशाल दादासाहेब कामठे, दादासाहेब कामठे (दोघे रा. येवलेवाडी, पुणे) आणि जालिंदर निंबाळकर (पूर्ण नाव माहिती नाही) यांच्याविरुद्ध सासवड पोलिस ठाण्यात महाराष्ट्र सावकारी अधिनियमानुसार गुन्हा दाखल केला आहे. पोलिसांनी दिलेल्या माहितीनुसार, लोणकर यांनी एप्रिल २०२४ मध्ये त्यांच्या गट नं. ५६१ मधील ५ गुंठे जमीन विक्रीसाठी काढली होती. निंबाळकर यांच्या ओळखीने विशाल कामठे आणि दादासाहेब कामठे यांनी ही जमीन १७ लाख ५० हजार रुपयांना विकत घेण्याचे ठरवले. सुरुवातीला ९ लाख रुपये इसारपोटी दिले. मात्र, उर्वरित १३ लाख रुपये देण्यास टाळाटाळ करत, लोणकर यांनी इसार पावती रद्द करण्याची मागणी केली असता, त्यांनी ९ लाख रुपयांवर ४ लाख ५० हजार रुपये व्याज मागितले. लोणकर यांनी हे व्याज दिले, तरीही त्यांनी इसार पावती रद्द केली नाही. उलट जास्त व्याजापोटी आणखी ४ लाख रुपये मागितले आणि न दिल्यास १६ गुंठे शेतजमिनीवर ताबा घेण्याची धमकी दिली.
विशाल कामठे, दादासाहेब कामठे आणि निंबाळकर यांनी शनिवारी (ता. २६) सकाळी १० वाजण्याच्या सुमारास लोणकर यांच्या घरी येऊन शिवीगाळ केली आणि ४ लाख रुपये व्याजाची मागणी केली. तसेच, १६ गुंठे जमीन आपल्या नावावर करून देण्यास सांगितले. मागणी पूर्ण न झाल्यास हातपाय तोडण्याची आणि मुलाला जीवे मारण्याची धमकी दिली. या त्रासाला कंटाळून लोणकर यांनी औषध पिऊन आत्महत्येचा प्रयत्न केला. सध्या लोणकर यांच्यावर सासवड येथील खासगी रुग्णालयात उपचार सुरू आहेत. सासवडचे पोलिस निरीक्षक ऋषिकेश अधिकारी यांच्या मार्गदर्शनाखाली पुढील तपास सुरू आहे.