सासवडमधील चोरीप्रकरणात कामगाराला नांदेडमध्ये अटक

सासवड, ता. ७ : पुरंदर तालुक्यातील सासवड- सोनोरी रस्त्यावरील एका वीटभट्टी मालकाच्या घरातून ६० हजार रुपयांची रोख रक्कम चोरी केल्याप्रकरणी एका कामगाराला अटक करण्यात आली आहे. मधुकर केरबा नामावाड (रा. मरखेल, जि. नांदेड) , असे अटक केलेल्या कामगाराचे नाव आहे.
याबाबत विवेक संजय कुंभार (रा. सासवड) यांनी सासवड पोलिस ठाण्यात फिर्याद दाखल केली आहे. त्यानुसार फिर्यादी कुंभार यांची सासवड येथे वीटभट्टी असून, त्यांच्याकडे मधुकर नामावाड हा कामगार म्हणून होता. विवेक कुंभार यांनी मधुकर याला एका व्यक्तीला देण्यासाठी ६० हजार रुपये घरात ठेवण्यास सांगितले आणि ते बाहेर गेले. काही वेळाने परत आल्यावर त्यांना पैसे चोरीला गेल्याचे लक्षात आले आणि मधुकर त्याच्या कुटुंबासह पळून गेल्याचे दिसून आले.
याबाबत सासवड पोलिस ठाण्यात गुन्हा दाखल करण्यात आला. तपास करताना मधुकर त्याच्या मूळ गावी गेल्याची माहिती पोलिसांना मिळाली. सासवडचे पोलिस पथक स्थानिक पोलिसांच्या मदतीने त्याच्या शेतात पोहोचले असता पोलिसांना पाहून त्याने पळ काढला. पोलिसांनी सुमारे तीन किलोमीटर पाठलाग करून त्याला ताब्यात घेतले. पोलिसांनी त्याला अटक केली असून, त्याच्याकडून चोरीला गेलेली संपूर्ण रक्कम जप्त केली आहे.