मित्रांनी दारू पाजून बनवले जमिनीचे बोगस दस्तऐवज

सासवड, ता. ९ : मांडकी (ता. पुरंदर) येथील एका महिलेने पतीला त्यांच्या मित्रांनी दारू पाजून त्यांच्या वडिलोपार्जित जमिनीचे बोगस दस्तऐवज तयार केल्याचा आरोप केला आहे. या प्रकरणी सासवड पोलिस ठाण्यात दोघांविरोधात गुन्हा दाखल केला आहे.
याबाबत रूपाली नरेंद्र जाधव (वय ४२, रा. मांडकी) यांनी दिलेल्या फिर्यादीनुसार, त्यांचे पती नरेंद्र ज्ञानेश्वर जाधव यांना दारूचे व्यसन आहे. त्यांच्या याच व्यसनाचा गैरफायदा घेत त्यांचे मित्र किरण आनंदा भंडलकर (रा. मांडकी) आणि सौरभ दादा शितोळे (रा. कासारसाई, पुणे) यांनी संगनमत करून त्यांना दारू पाजली. दारूच्या नशेत असतानाच त्यांची दिशाभूल करून २० जून रोजी सासवड येथील दुय्यम निबंधक कार्यालयात त्यांच्या वडिलोपार्जित जमिनीचे साठेखत आणि कुलमुखत्यारपत्र नावावर करून घेतले. नरेंद्र जाधव आणि त्यांचे बंधू दौलत जाधव यांच्या नावावर गट क्रमांक ८९६ आणि ३०८/२ मध्ये एकूण ६ एकर १० गुंठे जमीन आहे. विशेष म्हणजे दौलत जाधव हे गेल्या ५-६ वर्षांपासून घरातून निघून गेले आहेत. तरीही त्यांच्या नावावरील जमिनीचाही बेकायदेशीरपणे व्यवहार केला आहे. जमिनीच्या व्यवहारापोटी कोणतीही रक्कम किंवा धनादेश आपल्याला किंवा आपल्या पतीला मिळाला नाही. या प्रकारानंतर आरोपींनी आठ दिवसांत जमीन परत करण्याचे आश्वासन दिले होते, मात्र ते पाळले नाही. त्यामुळे आपली फसवणूक झाल्याचे लक्षात आल्यानंतर त्यांनी पोलिसांत धाव घेतली. त्यानुसार गुन्हा दाखल केला आहे.