विमानतळाला जमिनी देण्यास शेतकऱ्यांचा विरोध : मेमाणे
सासवड, ता. १७ : पुरंदर तालुक्यातील प्रस्तावित आंतरराष्ट्रीय विमानतळासाठी जमिनी देण्यास स्थानिक शेतकऱ्यांचा तीव्र विरोध कायम आहे. पारगावच्या सरपंच ज्योती भाऊसाहेब मेमाणे यांनी यासंदर्भात प्रसिद्धी पत्रकातून आपली संतप्त प्रतिक्रिया व्यक्त केली असून, काही मूठभर लोक स्वार्थापोटी शेतकऱ्यांची दिशाभूल करत असल्याचा आरोप केला आहे. ‘जे खरे, प्रामाणिक आणि गरीब शेतकरी आहेत, त्यांचा प्रकल्पाला ठाम विरोध आहे,’ असे सांगत त्यांनी प्रकल्पासाठी समर्थन करणाऱ्यांनी आधी स्वतःची जमीन द्यावी, असे आव्हान दिले.
सरपंच मेमाणे यांच्या म्हणण्यानुसार, ‘‘पैशाच्या लोभापायी प्रकल्पाचे समर्थन करणारे मोजके लोक आहेत. हे लोक गावपातळीवर बाजूला फेकले गेलेले आहेत आणि त्यांना शेतकऱ्यांच्या हिताशी काहीही देणेघेणे नाही. जमिनीच्या दरासाठी जिल्हाधिकाऱ्यांकडे वारंवार बैठका घेणाऱ्या या लोकांच्या स्वतःच्या जमिनी बाधित क्षेत्रात येत नाहीत. हे लोक मोर्च्यांमध्ये विरोधाची भाषणे करतात आणि अंधारात मात्र पाप करतात.’’
ज्येष्ठ नेते शरद पवार यांच्या बैठकीचा संदर्भ देत सरपंच मेमाणे यांनी सांगितले की, जमिनींचे दर ठरवण्यासाठी हे लोक पवारसाहेबांकडे गेले होते, मात्र विमानतळ होणारच, असे ऐकून टाळ्या वाजवून परत आले. त्यामुळे सामान्य शेतकऱ्यांचे नुकसान निश्चित आहे. जे लोक समर्थन करत आहेत, त्यांनी आधी स्वतःच्या जमिनी प्रशासनाला देऊन दाखवाव्यात, असे आव्हानही त्यांनी दिले.
पुनर्वसनाच्या जुन्या उदाहरणांचाही दाखला मेमाणे यांनी दिला. वीर धरणाच्या राऊतवाडी आणि वीर येथील शेतकऱ्यांचे भूसंपादन तीस वर्षांपूर्वी झाले, तरी त्यांना अजूनही मोबदला मिळालेला नाही. तसेच, डिंभे धरणाच्या विस्थापितांना ४९ वर्षांनंतर जमिनींचा ताबा मिळाला, असे वास्तव त्यांनी समोर आणले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.