​सासवडची शिवालये भाविकांनी फुलली

सासवड, ता. १८ : श्रावण महिन्याचा शेवटचा सोमवार आणि पावसाची संततधार सुरू असतानाही सासवड (ता. पुरंदर) येथील शिवालये भाविकांच्या गर्दीने फुलून गेली होती. कऱ्हा नदीच्या काठावरील प्राचीन मंदिरात दर्शनासाठी सकाळपासूनच भाविकांच्या रांगा लागल्या होत्या.
येथील श्री चांगावटेश्वर मंदिरात रविवारी रात्री ११.३०पासून रूद्राभिषेक, सोमवारी पहाटे सहा, दुपारी १२ आणि सायंकाळी सात वाजता पूजा व आरती झाली. वटेश्वर सुधार समितीच्या वतीने दिवसभर खिचडी, केळी वाटप केली. दिवसभरात हजारो भाविकांनी दर्शनाचा लाभ घेतल्याची माहिती समितीचे प्रसाद जगताप यांनी दिली.
याप्रसंगी वटेश्वर सुधार समितीचे परशुराम देशमुख, अॅड नितीन जाधव,सुनील कामथे, रमेश जगताप, संजय चव्हाण, डॉ. अश्विनी माईनकर, शुभांगी न्हालवे, नम्रता एक्के, गौरी जगताप, ओम कामथे, स्नेहल कामथे, बबलू घोडके, किरण कुंभार यांनी नियोजन केले.
​येथील श्री सिद्धेश्वर आणि कऱ्हा व चांबळी नदीच्या संगमावरील श्री संगमेश्वर यांसारख्या प्रमुख शिवालयांमध्ये दिवसभर विविध धार्मिक कार्यक्रमांचे आयोजन करण्यात आले होते. पहाटेपासूनच मंदिरांमध्ये रुद्राभिषेक, पूजा आणि आरती आदी धार्मिक विधी संपन्न झाले. सकाळपासून सुरू असलेल्या श्रावण सरींनी वातावरणात गारवा निर्माण केला होता.