सासडवडच्या पोलिस ठाण्यासमोरील ​निरुपयोगी वाहनांची विल्हेवाट लावा

सासवड, ता. २६ : सासवड पोलिस ठाण्यासमोरून जाणाऱ्या पालखी महामार्गालगत पोलिस ठाण्याच्या संरक्षक भिंतीला लागूनच अनेक वर्षांपासून अपघात झालेली आणि वापरण्यायोग्य नसलेली वाहने धूळ खात पडून आहेत. यामुळे रस्त्याची एक बाजू व्यापली गेली आहे. अशा वाहनांची विल्हेवाट लावण्याची मागणी नागरिकांकडून केली जात आहे.
महामार्गालगतच अनेक वर्षांपासून पडून असलेली ही वाहने आता पूर्णपणे गंजली आहेत. या वाहनांनी रस्त्याचा काही भाग व्यापला आहे. यात भर म्हणून, सासवड शहरात विविध कामांसाठी, तसेच पोलिस ठाण्यातील विविध कामांसाठी येणाऱ्या नागरिकांची वाहने देखील या वाहनांलगत थांबतात. यामुळे रस्ता आणखी कमी होतो, असे सामाजिक कार्यकर्ते संतोष एकनाथराव जगताप यांनी सांगितले.
महामार्गावरील अपघातांचा वाढता धोका लक्षात घेता ही निरुपयोगी वाहने लिलाव किंवा स्क्रॅप करून हटवण्यात यावीत. ज्याप्रमाणे वाहतूक पोलिस प्रशासनाकडून रस्त्यावर बेशिस्तपणे थांबलेल्या वाहनांवर कारवाई केली जाते. त्याप्रमाणे याकडेही लक्ष देण्याची गरज असल्याचे जगताप यांनी सांगितले.