सासवडच्या विद्यालयात बनविले अडीच हजार ‘बीज गोळे’

सासवड, ता. ४ : माझी वसुंधरा अभियानांतर्गत सासवड (ता. पुरंदर) येथील श्री शिवाजी इंग्लिश मीडियम स्कूल आणि नगरपरिषद यांच्या वतीने विद्यालयात ‘बीज गोळा कार्यशाळा’ पार पडली. या उपक्रमात सुमारे २५० विद्यार्थ्यांनी अडीच हजार ‘बीज गोळे’ तयार केले.
यासाठी स्काउटर शीतल बोरुडे यांच्या मार्गदर्शनाखाली सहावीच्या विद्यार्थ्यांनी आंबा, चिंच, रिठा, सीताफळ अशा विविध प्रकारच्या वृक्षांच्या बिया वापरल्या. नगरपरिषदेचे शहर समन्वयक राम कारंडे यांनी प्रास्ताविकातून उपक्रमाचा उद्देश स्पष्ट केला. सेवानिवृत्त आरोग्य प्रमुख मोहन चव्हाण यांनी माझी वसुंधरा अभियानाचे महत्त्व सांगितले, तर आरोग्य निरीक्षक प्रकाश तुळसे यांनी विद्यार्थ्यांना वृक्षारोपण, बीज संवर्धन आणि पर्यावरणपूरक जीवनशैलीबद्दल मार्गदर्शन केले. प्राचार्या रेणुकासिंग मर्चंट यांनी पर्यावरण संवर्धनाची जबाबदारी प्रत्येकाची असल्याचे सांगितले.