म्हाडा वसाहतीत सुविधांचा अभाव

​सासवड, ता. ९ : सासवड (ता. पुरंदर) येथील सासवड- आंबोडी मार्गालगत असणाऱ्या म्हाडा वसाहतीतील सदनिकांमधील रहिवासी मूलभूत सोयीसुविधांच्या अभावामुळे त्रस्त झाले आहेत. म्हाडाने स्वस्त घर, स्वप्नातील घर, अशी जाहिरात करून घरे विकली असली तरी, प्रत्यक्षात या घरांमध्ये आवश्यक सुविधा नसल्याचा आरोप रहिवाशांनी केला आहे. यामुळे आधीच आर्थिक अडचणीत असलेल्या कुटुंबांच्या समस्या अधिक वाढल्या आहेत. वसाहतीभोवती संरक्षक भिंत नसल्याने सुरक्षिततेचा मोठा प्रश्न निर्माण झाला आहे. पाणीपुरवठा आणि वीज व्यवस्था अपुरी आहे. तसेच, भूमीगत पाण्याच्या टाकीची सोय नाही. नियमानुसार वाहनतळाची जागा उपलब्ध नाही. सोसायटी स्थापन करण्यासाठी कोणतीही मदत केली जात नाही. तसेच, सोसायटीसाठी कार्यालयीन जागेचाही अभाव आहे. वसाहतीचा परिसर आणि सार्वजनिक सुविधा अपुऱ्या असल्याबाबत येथील रहिवाशांनी म्हाडाकडे अनेकदा तक्रारी केल्या आहेत. याबाबत रहिवासी दशरथ चव्हाण यांनी म्हाडाकडे या समस्यांवर तातडीने लक्ष देण्याची मागणी केली आहे.

​