सासवड बसस्थानकात सांडपाण्यामुळे दुर्गंधी

​सासवड, ता. १८ : सासवड बसस्थानकातील मलनिस्सारण वाहिनी गेल्या दोन महिन्यांपासून तुंबल्याने प्रवाशांना सांडपाण्यातून वाट काढावी लागत आहे. यामुळे परिसरात दुर्गंधी पसरली असून विद्यार्थी, प्रवासी व कर्मचाऱ्यांचे आरोग्य धोक्यात आहे. तसेच, बसस्थानक परिसरात होणाऱ्या खाजगी वाहनांच्या अवैध पार्किंगमुळे एसटी बसेसना येण्या-जाण्यास अडथळा निर्माण होऊन प्रवाशांची मोठी गैरसोय होत आहे. याबरोबरच सीएनजी भरण्यासाठी येणारी खाजगी वाहने आणि रात्रीच्या वेळी होणारी अस्ताव्यस्त पार्किंग यांमुळे लांब पल्ल्याच्या बसेस स्थानकात येण्यास टाळाटाळ करीत आहेत. परिणामी, प्रवाशांना रस्त्यावर उभे राहून बस थांबवाव्या लागतात. या दोन्ही समस्यांकडे प्रशासनाने तातडीने लक्ष देण्याची मागणी प्रवाशांकडून होत आहे.
याबाबत सासवड एसटी आगार प्रमुख मोहिनी डेरे यांनी सांगितले की, बसस्थानकात दुचाकी व चारचाकी वाहनांचे अवैध पार्किंग केले जाते. या अडथळ्यांमुळे आतापर्यंत दोन अपघात झाले. याबाबत संबंधित वाहनचालकांवर दंडात्मक कारवाई करावी तसेच येथे वाहतुक पोलिस कर्मचारी उपलब्ध करून देण्याची मागणी पोलिस निरीक्षकांना केली आहे.

मलनिस्सारण वाहिनी तुंबल्यामुळे स्थानकातील उपहारगृह व रसवंतीगृहाचे सांडपाणी थेट रस्त्यावर वाहत आहे. स्थानकात काँक्रिटीकरण असल्याने हे काम स्थानिक स्तरावर करणे अवघड आहे. याबाबत राज्य परिवहनच्या विभागीय अभियंत्यांकडे आठ दिवसांपूर्वी पत्रव्यवहार करून त्वरित दुरुस्तीची मागणी केली आहे.
- मोहिनी डेरे, आगार प्रमुख, सासवड