हातपंप कर्मचाऱ्यांच्या मागण्यांसाठी शासनाकडे साकडे

​सासवड, ता. २२ : पुणे जिल्ह्यातील ग्रामीण भागात पाणीपुरवठा सेवा देणाऱ्या हातपंप देखभाल व दुरुस्ती कर्मचाऱ्यांच्या प्रलंबित मागण्यांसाठी ''हातपंप देखभाल व दुरुस्ती कर्मचारी संघटने''ने आक्रमक पवित्रा घेतला आहे. सासवड येथे जिल्हाध्यक्ष नारायण सावंत यांच्या अध्यक्षतेखाली झालेल्या बैठकीत मागण्यांचे निवेदन मुख्यमंत्री व संबंधित मंत्र्यांना ई-मेलद्वारे पाठवण्यात आले.
​यावेळी कामगार नेते ज्ञानोबा घोणे, मोहनराव चव्हाण उपस्थित होते. अनेक वर्षांपासून काम करणाऱ्या या कर्मचाऱ्यांना शासकीय सेवेत सामावून घेऊन जिल्हा परिषदेप्रमाणे वेतनश्रेणी लागू करावी, भविष्य निर्वाह निधी योजनेची अंमलबजावणी करावी, दरमहा पे-स्लिप मिळावी आणि १५ लाख रुपयांचा विमा उतरवावा, अशा प्रमुख मागण्या करण्यात आल्या आहेत. ​या मागण्यांबाबत मुख्यमंत्री देवेंद्र फडणवीस, पाणीपुरवठा मंत्री गुलाबराव पाटील व ग्रामविकास मंत्री जयकुमार गोरे यांना साकडे घालण्यात आले असून, लवकरच मंत्रालयात शिष्टमंडळ भेटणार आहे. बैठकीला महादेव जाधव, विशाल काळे, दिनेश पवार, कैलास सुर्वे, समीर सुतार यांच्यासह विविध तालुक्यातील कर्मचारी उपस्थित होते.

6449