पिंगळे स्मारकाच्या छतावर तळेगावात कोसळली झाडे

तळेगाव ढमढेरे, ता.१६: तळेगाव ढमढेरे (ता.शिरूर) येथील हुतात्मा विष्णू गणेश पिंगळे स्मारकातील झाडे बुधवारी (ता.१५) वादळी वाऱ्यासह झालेल्या अवकाळी पावसामुळे जमीनदोस्त झाली. यामुळे मोठे नुकसान झाले आहे. वादळी वाऱ्यामुळे येथील संरक्षक भिंतही ढासळली आहे.
येथील दोन झाडे स्मारकातील छतावर पडल्याने छताचे नुकसान झाले आहे तर काही झाडे स्मारकातील परिसरात पडली आहेत. बऱ्याच वर्षांची झाडे असल्याने येथे पशू पक्ष्यांची घरटी मोठ्या प्रमाणात होती. झाडे जमीनदोस्त झाल्यामुळे घरट्यासह पशुपक्षी मृत्युमुखी पडले आहेत. येथील जमीनदोस्त झाडांची प्रशासनाने पाहणी केली आहे.

दरम्यान, ग्रामपंचायत पदाधिकारी, पोलिस हवालदार किशोर तेलंग, माजी उपसरपंच नवनाथ ढमढेरे, अशोक ढमढेरे, सामाजिक कार्यकर्ते हनुमंत भुजबळ, कल्पेश भुजबळ, समीर शिंदे व ग्रामस्थांनी येथील जमीनदोस्त झालेल्या झाडांबद्दल हळहळ व्यक्त केली आहे.

06005