विहिरींच्या पाणी पातळीत तळेगाव परिसरामध्ये वाढ

तळेगाव ढमढेरे, ता.२८ : तळेगाव ढमढेरे परिसरात (ता. शिरूर) पडलेल्या पावसामुळे विहिरी व विंधन विहिरींच्या पाणी पातळीत वाढ झाली आहे. त्यामुळे उन्हाळ्यातील पाणीटंचाई दूर झाली आहे.

गेली ३०-४० वर्षांत मे महिन्यात पहिल्यांदाच असा पाऊस झाला असल्याचे शेतकरी रमेश भुजबळ, अभिजित नरके, राजेंद्र केदारी, बाळासाहेब ढमढेरे, बबनराव भुजबळ, सोसायटीचे माजी अध्यक्ष ज्ञानेश्वर भुजबळ, निवृत्ती जकाते, ॲड.संपत ढमढेरे, शहाजी ढमढेरे, मधुकर भुमकर, सुदामराव भुजबळ, गोविंद ढमढेरे, गोविंद भुजबळ, शिवाजी भुजबळ, बंडोबा दरवडे, हनुमंत भुजबळ, विकास भुजबळ यांच्यासह ग्रामस्थांनी सांगितले.
मे महिन्यात आत्तापर्यंत २०२ मिलिमीटर पावसाची नोंद झाली आहे. पावसामुळे शेतातील सर्व रस्ते जलमय झाले आहेत. येथील वेळनदी व मुरळ ओढा मे महिन्यात गेल्या ४० वर्षांत पहिल्यांदाच पाण्याने वाहत असल्याचे चित्र दिसत आहे.

शिरूर तालुक्यातील तळेगाव ढमढेरे, विठ्ठलवाडी, धानोरे, निमगाव म्हाळुंगी, टाकळी भीमा, कासारी, कोंढापुरी, करंजावणे, भांबर्डे आदी गावांमध्ये उसाची पिके मात्र जोमदार आलेली आहेत. मॉन्सून पूर्व पावसामुळे शेतकऱ्यांनी समाधान व्यक्त केले आहे.
दरम्यान, परिसरात पावसामुळे शेतकऱ्यांची शेतातील कामे ठप्प झाली असली तरी काही ठिकाणी पावसातही उसाची लागवड झाल्याचे चित्र दिसत आहे.