भुईमूग काढणीची कोंढापुरीत लगबग

तळेगाव ढमढेरे, ता. ७ : कोंढापुरी (ता.शिरूर) परिसरात पावसाने उघडीप दिल्याने उन्हाळा हंगामात पेरणी केलेल्या भुईमुगाच्या शेंगा काढणीला सुरुवात झाली आहे. येथील शेतकरी दत्तात्रेय (डी. एल. नाना) गायकवाड यांच्या शेतातील भुईमुगाच्या शेंगा काढण्यासाठी लगबग सुरू झाली आहे. शेंगा काढण्यासाठी मजूरही मिळत आहेत. शेताची योग्य मशागत केल्याने एका वेलाला भुईमुगाच्या शेंगा चांगल्या लागलेल्या आहेत. पीक चांगले आल्याने भुईमुगाचे उत्पादन हे बऱ्यापैकी निघणार असल्याचे श्री गायकवाड यांनी सांगितले.
दरम्यान, शिरूर तालुक्यातील तळेगाव ढमढेरे, धानोरे, विठ्ठलवाडी, टाकळी भीमा, कासारी, निमगाव म्हाळुंगी, भांबर्डे, करंजावणे आदी परिसरातही उन्हाळ्यात लागवड केलेल्या भुईमुगाच्या पिकाची काढणी सुरू झाली आहे. चालू हंगामात भुईमुगाच्या शेंगा बऱ्यापैकी असल्याने उत्पन्न समाधानकारक निघेल असे शेतकरी सांगत आहेत.