सर्वसामान्य कुटुंबातील वृंदाचे सीए परीक्षेत यश

तळेगाव ढमढेरे, ता. १० : येथील सर्वसामान्य कुटुंबातील वृंदा विकास तकटे हिने ‘द इन्स्टिट्यूट ऑफ चार्टर्ड अकाउंट ऑफ इंडिया’ यांच्या वतीने मे २०२५ मध्ये घेण्यात आलेल्या सीए अंतिम परीक्षेत घवघवीत यश संपादन केले.
वृंदाचे प्राथमिक शिक्षण जिल्हा परिषद प्राथमिक शाळा तळेगाव ढमढेरे (ता. शिरूर) येथे झाले असून येथील स्वातंत्र्य सैनिक रायकुमार गुजर प्रशालेत १२ वीपर्यंतचे शिक्षण झाले आहे. तसेच साहेबराव शंकरराव ढमढेरे महाविद्यालयात वाणिज्य शाखेची पदवी तिने घेतली असून पदव्युत्तर शिक्षण शिरूर येथील चांदमल ताराचंद बोरा महाविद्यालयात घेतले आहे. इयत्ता बारावीनंतर तिने सीए परीक्षेची तयारी सुरू केली होती.
वृंदाचे वडील एका कंपनीत कामगार आहेत, तर आई गृहिणी आहे. आपली मुलगी सीए व्हावी अशी तिच्या वडिलांची अपेक्षा होती. १२ वीनंतर फाउंडेशन परीक्षेत २०० पैकी १५३ गुण मिळवून इंटरमिजिएट परीक्षेची तयारी तिने सुरू केली. इंटरमिजिएट परीक्षेत ग्रुप एकमध्ये ४०० पैकी २०० गुण मिळवून तिने यश प्राप्त केले. तर ग्रुप दोनमध्ये तिला अपयशाला सामोरे जावे लागते. परंतु जिद्द व चिकाटीच्या जोरावर अभ्यासात सातत्य राखून तिने ग्रुप दोनची तयारी करत यामध्ये ३०० पैकी १६१ गुण मिळविले. सीएच्या अंतिम परीक्षेत दोन्ही ग्रुपमध्ये एकाच वेळी उत्तीर्ण होऊन तिने ग्रुप एकमध्ये ३०० पैकी १८७ गुण व ग्रुप दोनमध्ये ३०० पैकी १५२ गुण मिळवून मोठे यश संपादन केले. तिच्या या कामगिरीचे ग्रामस्थांसह तळेगाव ढमढेरे पंचक्रोशीतील नागरिकांनी विशेष कौतुक करून तिचे अभिनंदन केले आहे.

‘‘या यशात आई, वडील, भाऊ व संपूर्ण तकटे परिवार आणि गुरुजनांचा मोलाचा वाटा आहे. परीक्षेचा अभ्यास करण्यासाठी मैत्रिणींनी मोठी साथ दिली. जिद्द, चिकाटी, परिश्रम व अभ्यासातील सातत्य यामुळे मला या परीक्षेत अतुलनीय यश मिळाले,’’ असे वृंदाने सांगितले.