प्रारूप आराखड्यावर ग्रामस्थांची तीव्र नाराजी

तळेगाव ढमढेरे, ता.१५: पुणे जिल्हा परिषद आणि पंचायत समितीच्या निवडणुकीसाठी जिल्हा प्रशासनाकडून प्रसिद्ध करण्यात आलेल्या प्रारूप आराखड्यावर तळेगाव ढमढेरे (ता.शिरूर) येथील बहुतांश ग्रामस्थांनी तीव्र नाराजी व्यक्त केली आहे.
शिरूर तालुक्यात जिल्हा परिषदेचे एकूण ७ गट आणि पंचायत समितीचे १४ गण सन २०११ च्या जनगणनेनुसार तयार केले आहेत. शिरूर तालुक्यात कवठे येमाई, न्हावरा, रांजणगाव गणपती, पाबळ, सणसवाडी, शिक्रापूर आणि मांडवगण फराटा असे ७ जिल्हा परिषदेचे गट तयार करण्यात आले आहेत. गट आणि गण रचनेचे प्रारूप प्रसिद्ध झाल्यानंतर तळेगाव ढमढेरे ग्रामस्थांमध्ये तीव्र नाराजी व्यक्त करण्यात आली आहे.
तळेगाव ढमढेरे गावाला ऐतिहासिक वारसा लाभला आहे.
जिल्हा परिषदेच्या स्थापनेपासून तळेगाव ढमढेरे गट कधीही न विभागात कायम आहे. परंतु नवीन आराखड्यानुसार तळेगाव ढमढेरे जिल्हा परिषद गट विसर्जित करण्यात आला असून तळेगाव ढमढेरे गावाचे दोन गटात विभाजन करण्यात आले आहे. गट तर विसर्जित केलाच परंतु गावातील एक प्रभाग सणसवाडी गटाला जोडला असून, उर्वरित दोन ते सहा प्रभाग शिक्रापूर गटाला जोडले आहेत.
शिक्रापूर गटामध्ये शिक्रापूर, कासारी, निमगाव म्हाळुंगी, तळेगाव ढमढेरे, पारोडी, दहिवडी, करंजावणे, भांबर्डे, उरळगाव, टाकळी भीमा ही गावे समाविष्ट करण्यात आली आहेत.
सणसवाडी गटात कोरेगाव भीमा, वाडा पुनर्वसन, आपटी, वाढू बुद्रुक, डिंग्रजवाडी, वाजेवाडी, सणसवाडी, धानोरे, दरेकरवाडी, विठ्ठलवाडी व तळेगाव ढमढेरे या गावांचा समावेश आहे.
तळेगाव ढमढेरे गावामध्ये एकूण सहा प्रभाग आहेत. त्यापैकी प्रभाग क्रमांक एक सणवाडीला जोडला आहे तर प्रभाग क्रमांक दोन ते सहा शिक्रापूर गटात जोडले आहेत. एकसंध असलेले तळेगाव ढमढेरे गाव जिल्हा परिषद गटात मात्र दोन गटात जोडल्याने नागरिकांनी तीव्र नाराजी व्यक्त केली आहे. आमचे एकसंध असलेले गाव प्रशासनाने विभागल्याने राजकीय क्षेत्रात मात्र खळबळ उडाली आहे. तसेच तळेगाव ढमढेरे हा कायम जिल्हा परिषदेचा गट पूर्ण नामशेष केल्याने सर्वच राजकीय पक्षांमध्ये अस्वस्थता निर्माण झाली आहे.
तळेगाव ढमढेरे गावातून आतापर्यंत शिरूर तालुक्याचे राजकीय व सामाजिक नेतृत्व उदयास आले आहे. पंचायत समितीचे पहिले सभापती, जिल्हा परिषदेचे उपाध्यक्षपद, जिल्हा परिषद सदस्य, सहकारी बँकेचे अध्यक्ष व उपाध्यक्षपद, जिल्हा दूध संघाचे अध्यक्षपद, बाजार समितीचे सभापती व उपसभापतीची पदे, विविध राजकीय पक्षांची पदे आदी विविध क्षेत्रातील महत्त्वाची पदे तळेगाव ढमढेरे गावाला आतापर्यंत मिळालेली आहेत. अलीकडील काळात सर्वच राजकीय पक्षांमध्ये स्थित्यंतर झाल्याने राजकीय वातावरण अस्थिर झाले आहे. अशातच विविध पक्षांची अध्यक्षपदे तळेगाव ढमढेरे गावातच देण्यात आलेली आहेत.
चौकट : अखंडित तळेगाव ढमढेरे गाव जिल्हा परिषद गटात नामशेष केले असून, दोन जिल्हा परिषद गटात गावाची विभागणी केल्याने आम्ही सर्व ग्रामस्थ अस्वस्थ झालो असून, प्रशासनाबद्दल सर्वांचीच नाराजी आहे. जिल्हा परिषदेच्या या निर्णयाविरुद्ध येत्या दोन दिवसात तातडीने ग्रामसभा घेऊन जिल्हाधिकाऱ्यांकडे हरकती व सूचना नोंदविणार आहोत. तळेगाव ढमढेरे हा जिल्हा परिषद गट पूर्वीप्रमाणेच कायम राहावा यासाठी आम्ही सर्व ग्रामस्थ एकत्रित येऊन विरोध करणार असल्याची प्रतिक्रिया जिल्हा राष्ट्रवादी काँग्रेस शरदचंद्र पवार पक्षाचे उपाध्यक्ष बाळासाहेब नरके, तालुका अध्यक्ष विश्वास ढमढेरे, जिल्हा राष्ट्रवादी काँग्रेसचे उपाध्यक्ष महेश ढमढेरे, घोडगंगा कारखान्याचे उपाध्यक्ष पोपट भुजबळ, राष्ट्रवादी काँग्रेस महिला आघाडीच्या तालुका अध्यक्ष आरती भुजबळ, भाजपचे क्रीडा आघाडीचे जिल्हाध्यक्ष रवींद्र ढमढेरे, भाजपचे उपाध्यक्ष संदीप ढमढेरे व बहुतांश पदाधिकारी आणि ग्रामस्थांनी सकाळशी बोलताना सांगितले.