तळेगावात बाजारात शेतकरी व्यापाऱ्यांची गर्दी

तळेगाव ढमढेरे, ता.२१: तळेगाव ढमढेरे (ता.शिरूर) येथील शिरूर कृषी उत्पन्न बाजार समितीच्या महात्मा फुले उपबाजारात सोमवारी (ता. )झालेल्या आखाडाच्या शेवटच्या आठवड्यात सुमारे २५०० हजार शेळी, बोकड व मेंढ्यांची विक्रमी आवक झाल्याची माहिती बाजार समितीचे सचिव अनिल ढोकले व सहाय्यक सचिव अनिल ढमढेरे यांनी दिली.
आषाढ महिन्यातील शेवटचा आखाडातील आठवडा असल्याने आजच्या बाजारात शेतकरी व व्यापाऱ्यांनी मोठी गर्दी केली होती. आज सकाळी काही काळ शिक्रापूर- तळेगाव ढमढेरे या रस्त्यावर बाजार समितीच्या समोर वाहतूक कोंडी झाली होती. वाहतूक कोंडीचा त्रास अनेकांना झाला. येथील वाहतूक कोंडी कमी करण्यासाठी बाजार समितीतील कर्मचाऱ्यांनी विशेष प्रयत्न केले.
दरम्यान, आजच्या बाजारात शेळी व बोकडाला प्रत्येकी ७००० हजार रुपये ते १५००० हजार रुपयांपर्यंत बाजार भाव मिळाला. तसेच मेंढीला ४००० रुपये ते ७००० हजार रुपयांपर्यंत बाजारभाव मिळाल्याने शेतकरी व मेंढपाळांनी समाधान व्यक्त केले आहे. आजच्या बाजारात आखाडामुळे कोंबड्यांची मोठी आवक झाली होती. एका कोंबडीला सुमारे ४०० ते ६०० रुपयांपर्यंत बाजारभाव मिळाला.

आजच्या बाजारात पुणे, अहिल्यानगर, अलिबाग, मुंबई, चाकण या ठिकाणचे व्यापारी आले होते. तसेच पुणे, अहिल्यानगर या जिल्ह्यातील मेंढपाळांनी शेळी, बोकड व मेंढ्या विक्रीसाठी आणल्या होत्या. येथील बाजाराचे उत्कृष्ट नियोजन कर्मचाऱ्यांनी केले. यामध्ये सहाय्यक सचिव अनिल ढमढेरे, दादाभाऊ नरके, सूरज शेलार, प्रशांत ढमढेरे, अतुल पिंगळे, गणेश पंडित, वैष्णव मेटे, दशरथ शेलार आदी कर्मचाऱ्यांनी बाजार सुरळीत होण्यासाठी विशेष परिश्रम घेतले. आजच्या बाजारात बाजार समितीला सुमारे ७० हजार रुपये आर्थिक उत्पन्न गोळा झाले.