तळेगाव ढमढेरेमध्ये मंदिराचा लोकार्पण सोहळा

तळेगाव ढमढेरे, ता. ४ : तळेगाव ढमढेरे (ता. शिरूर) येथे जीर्णोद्धार केलेल्या पांडुरंग मंदिराचा लोकार्पण सोहळा, मूर्तींची प्राणप्रतिष्ठा आणि कलशारोहण तसेच मूर्तींची मिरवणूक काढण्यात आली होती. त्यानिमित्त पहाटे मंदिरात होमहवन, मूर्तींची पूजा करण्यात आली. मान्यवरांच्या हस्ते प्राणप्रतिष्ठा आणि कलशारोहण करण्यात आले. यावेळी औदुंबर महाराज गदादे यांचे कीर्तन झाले.
दोन दिवस झालेल्या या सोहळ्यात पहिल्या दिवशी गावातून टाळ मृदंगाच्या गजरात मूर्तींची मिरवणूक काढण्यात आली. यामध्ये भजनी मंडळ, महिला, ज्येष्ठ नागरिक, ग्रामस्थ सहभागी झाले होते.
दरम्यान, येथील पांडुरंग मंदिराचा जीर्णोद्धार लोकवर्गणीतून आणि दानशूरांच्या मदतीने करण्यात आला असून, मंदिराचे लोकार्पण यावेळी करण्यात आले. मंदिरातील विठ्ठल-रुक्मिणी मूर्तींची प्राणप्रतिष्ठा करण्यात आली. तसेच कलशारोहण करण्यात आले.
कार्यक्रमाला तळेगाव ढमढेरे पंचक्रोशीतील आजी-माजी पदाधिकारी, मान्यवर, ग्रामस्थांनी हजेरी लावली होती. यावेळी उपस्थितांना महाप्रसादाचे वाटप करण्यात आले. मंदिराचा जीर्णोद्धार करण्यासाठी पंचक्रोशीतील दानशूरांनी मदत केली आहे. यामध्ये वस्तू रूपात आणि रोख स्वरूपात मदत करण्यात आली. येथील पांडुरंगाचे आकर्षक मंदिर अवघ्या चार महिन्यांमध्ये साकारले आहे. त्यासाठी सुमारे ६५ लाख रुपये खर्च झाल्याची माहिती रमेश भुजबळ, महेश भुजबळ, दीपक लांडे, दशरथ सायकर, विकास खेडकर, ज्ञानेश्‍वर भुजबळ यांनी दिली. स्वागत तंटामुक्त गाव समितीचे माजी अध्यक्ष रमेश भुजबळ यांनी केले. सतीश भुजबळ यांनी सूत्रसंचालन केले.