तळेगाव ढमढेरेत डीजे मालकावर गुन्हा

पुणे, ता.७ : तळेगाव ढमढेरे (ता. शिरूर) येथे सार्वजनिक गणेशोत्सव विसर्जन मिरवणुकीत क्रांतिवीर गणेशोत्सव मंडळाचे अध्यक्ष व डीजे मालकावर शिक्रापूर पोलिसांनी गुन्हा दाखल केला आहे.
यासंदर्भात पोलिस हवालदार शिवाजी सितारे यांनी फिर्याद दिली आहे. मिरवणुकीतील पहिल्या क्रमांकावर असलेले क्रांतिवीर गणेशोत्सव मंडळाची मिरवणूक पूर्ण होत आली असताना बाजूलाच कोपऱ्यामध्ये मंडळाचे अध्यक्ष व डीजे मालकाने पाठीमागून येणाऱ्या सार्वजनिक गणेश उत्सव मंडळांना सार्वजनिक उपद्रव करण्याच्या उद्देशाने साउंड सिस्टिम वाजवून वेडेवाकडे नाचून चिथावणी दिली. यावेळी पोलिस पथकाद्वारे सदर मंडळास व साउंड सिस्टीम मालकास सार्वजनिक होणारा उपद्रव बंद करण्याची सूचना देऊन पुढे जाण्याचे सांगितले. परंतु त्यांनी पोलिसांच्या सूचनांचे पालन न करता क्रांतिवीर चौकात, नाथ आळी रोडवरील कोपऱ्यावर त्याच ठिकाणी थांबून पाठीमागून येणाऱ्या प्रत्येक मंडळांना साउंड सिस्टिम वाजवून वेडेवाकडे नाचून चिथावणी देऊन सार्वजनिक उपद्रव चालूच ठेवला. त्यामुळे पोलिसांनी साउंड सिस्टिम व ट्रॅक्टर ताब्यात घेतला. यावेळी सार्वजनिक उपद्रव करणारे मंडळाचे अध्यक्ष, कार्यकर्ते व साउंड सिस्टिम मालक हे तेथून पळून गेले. या मंडळाचे अध्यक्ष व कार्यकर्ते आणि साउंड सिस्टिम मालकावर पोलिसांनी गुन्हा दाखल केला आहे. पुढील तपास शिक्रापूर पोलिस करीत आहेत.