कासारी फाटा चौकात सुविधा करण्याची मागणी

तळेगाव ढमढेरे, ता. १५ : पुणे- अहिल्यानगर महामार्गावरील कासारी फाटा चौकात (ता. शिरूर) प्रशासनाने विविध सुविधा उपलब्ध करून द्याव्यात, अन्यत आंदोलन करण्यात येईल, असा इशारा निमगाव म्हाळुंगीचे माजी उपसरपंच तेजस यादव यांनी महाराष्ट्र राज्य पायाभूत सुविधा विकास महामंडळाचे मुख्य अभियंता यांना निवेदनाद्वारे दिला आहे.
‘कासारी फाटा चौक बनला अपघातांचा हॉटस्पॉट’ या शीर्षकाखाली ‘सकाळ’मध्ये (ता. १२) बातमी प्रसिद्ध झाली होती. त्याचा आधार घेत तेजस यादव यांनी कासारी फाटा चौकात विविध सुधारणा कराव्यात, अशी मागणी महाराष्ट्र राज्य पायाभूत सुविधा विकास महामंडळाचे मुख्य अभियंता यांच्याकडे निवेदनाद्वारे केली आहे. कासारी फाटा येथील चौकात पुणे- अहिल्यानगर रस्त्यावर अपघात टाळण्यासाठी गतिरोधक बसविणे, तसेच तळेगाव ढमढेरे- कासारी फाटा बाह्यवळण रस्त्यावरून विरुद्ध दिशेने वाहनांची वाहतूक होत असल्याने त्या ठिकाणी नवीन रस्ता दुभाजक तयार करणे, तसेच या भागातील रस्त्यावरील अपघात टाळण्यासाठी येथील चौकात विविध उपाययोजनांची त्वरित तरतूद करावी, अशी मागणी निवेदनात केली. त्याची तरतूद न झाल्यास प्रशासकीय अधिकाऱ्यांचे फलक बनवून त्यावर हार घालण्याचे आंदोलन करण्यात येईल, असा इशारा त्यांनी निवेदनाद्वारे दिला आहे.
दरम्यान, आपण मागणी केलेल्या रस्त्याचे काम नजीकच्या कालावधीत हाती घेण्यात येणार आहे. लोकहितार्थ केलेल्या मागणीचा सहानुभूतीपूर्वक विचार करून आवश्यक त्या मान्यतेअंती सदरचे काम हाती घेण्यासाठी नियोजन करण्यात येईल, असे लेखी आश्वासन कार्यकारी अभियंता ओमप्रकाश निला यांनी तेजस यादव यांना दिले.