‘तळेगावचा बाजार पटांगणात भरवावा’

तळेगाव ढमढेरे, ता. १६ : येथे दर सोमवारी राष्ट्रीय महामार्गाच्या कडेला भरणारा आठवडा बाजार वेशीच्या आत गावात असलेल्या महत्त्वाच्या पटांगणात भरवावा, अशी मागणी व्यापारी संघटनेने ग्रामपंचायतीकडे मंगळवारी केली.
तळेगाव ढमढेरे (ता. शिरूर) येथील बाजारतळातून शिक्रापूर- न्हावरे हा राष्ट्रीय महामार्ग जात असून, त्याचे काम प्रगतिपथावर आहे. या महामार्गालगत दर सोमवारी भरणारा आठवडा बाजार गावातील जनसेवा चौक, दुर्गा आळी पटांगण, डॉ. बाबासाहेब आंबेडकर चौक वेशीच्या वर, जय बजरंग मंडळ आणि भीमाशंकर मंडळाचे पटांगण आदी ठिकाणी गावात वेशीत आठवडा बाजार भरवावा, अशा प्रकारचे निवेदन व्यापारी संघटनेतर्फे ग्रामपंचायतीला दिले आहे. निवेदनावर सुमारे ९० व्यापारी व दुकानदारांच्या सह्या आहेत. सरपंच रोहिणी तोडकर यांनी व्यापारी संघटनेने दिलेले निवेदन स्वीकारले.
आम्ही सुचवल्याप्रमाणेच वेशीच्या आत पटांगणात बाजार भरवावा इतरत्र बाजार कुठेही नेऊ नये, असे व्यापारी संघटनेच्या निवेदनात म्हटले आहे.