वारकरी वारकरी

गेली २७ वर्षे मी पंढरपूरची पायी वारी करीत आहे. पूर्वीच्या वारीत आणि आताच्या वारीत मोठा बदल झाला असून, सध्या वारकरी आधुनिक तंत्र व सोशल मीडियाचा प्रभावीपणे वापर करीत आहे. तरुण वर्गही मोठ्या प्रमाणात दिंडीत सहभागी होता आहे, याचा निश्चित आनंद होतो. शासनाच्या वतीने ठिकठिकाणी वारकऱ्यांसाठी शौचालय व आरोग्याच्या सुविधा उपलब्ध करून देण्यात येत आहे. मंदिर परिसरामध्ये मोठ्या प्रमाणात गर्दी होत आहे. त्यावर शासनाने मार्ग काढून पंढरपूरला उज्जैनच्या धर्तीवर विकास प्रकल्प आराखडा तयार करणे गरजेचे आहे.
- सुभाष गावडे, टाकळी हाजी (ता. शिरूर)

मी २४ वर्षे नियमितपणे वारी करीत आहे. पंढरपूरची वारी ही ऊर्जा देणारी आहे. या वारीमध्ये आम्ही देहभान विसरून सहभाग घेतो. यावर्षी वरुणराजाने हजेरी लावल्यामुळे वारकऱ्यांचा आनंद द्विगुणित झाला. देवाच्या कृपेने प्रपंचामध्ये काहीही कमी पडत नाही, हा आमचा पंढरीच्या वारीचा अनुभव आहे. शासनाने पालखी मार्गाचे काम लवकर पूर्ण करणे गरजेचे आहे.
- भाऊसाहेब दुडे, निमगाव दुडे (ता. शिरूर)

आयुष्यामध्ये आल्यानंतर पंढरीची वारीचा अनुभव माणसाने निश्चित घेतला पाहिजे. त्यामुळे आयुष्यात निश्चितच बदल होतो. मी नियमितपणे गेले २४ वर्षे पंढरीच्या वारीमध्ये विणेकरी आहे. यावर्षी शासनाच्या वतीने अत्यंत चांगले नियोजन केले होते. पाऊस पाणी चांगला झाल्यामुळे शेतीची कामे उरकून शेतकरी आनंदाने वारीमध्ये तल्लीन झालेला दिसत होता. आयुष्याच्या शेवटपर्यंत पंढरीची वारी सुरू ठेवणार आहे.
- तुकाराम घोडे, टाकळी हाजी (ता. शिरूर)

वारीमध्ये मी दरवर्षी जात आहे. वारकऱ्यांची खूप मनोभावे सेवा नागरिक करीत असतात. या ठिकाणी कोणत्याही गोष्टीची कमतरता भासत नाही. वारीमध्ये देहभान विसरून वारकरी भक्त चालत असतात. शासनाच्या वतीने, तसेच विविध संस्थांच्या वतीने भावी भक्तांसाठी मदत व सहकार्य केले जाते. वारीमध्ये माणसाला ऊर्जा मिळते, ही दूरच्या आयुष्यामध्ये जगण्याची प्रेरणा देऊन जाते.
- मंगल बाबाजी पांढरकर, माळवाडी (ता. शिरूर)

00260