बिबट्याला जेरबंद करण्यासाठी जांबूतला ग्रामस्थांचा रास्ता रोको

टाकळी हाजी, ता.२७ : जांबूत (ता.शिरूर) येथे महिलेवर बिबट्याने केलेल्या हल्याच्या निषेधार्थ ग्रामस्थांनी गाव बंद ठेवून निषेध व्यक्त केला व रास्ता रोको केले. मात्र, वनविभागाने बिबट्याला आठ दिवसांत जेरबंद करण्याचे लेखी आश्‍वासन दिले. यामुळे संतप्त ग्रामस्थांनी आंदोलन मागे घेतले. वन विभागाने तात्काळ परिसरात दहा पिंजरे लावून बिबट्या जेरबंद करण्यासाठी रेस्क्यू टीमच्या माध्यमातून तयारी केली आहे.
लेखी आश्र्वसनाशिवाय मृतदेह अंत्यविधीसाठी गावातून हलविणार नाही, अशी ठाम भूमिका घेतली. यावेळी तालुका वन परीक्षेत्र अधिकारी प्रताप जगताप यांनी लेखी आश्वासन देण्याचे कबूल केल्यानंतर मृतदेह अंत्यविधीसाठी नेण्यात आला.
याप्रसंगी माजी आमदार पोपटराव गावडे, माजी सभापती देवदत्त निकम, माजी पंचायत समिती सदस्या अरुणा घोडे, शेखर पाचुंदकर, सरपंच दत्ता जोरी, नाथा जोरी, बाळासाहेब फिरोदिया, बाळासाहेब कड बाळासाहेब बदर, पोलिस निरीक्षक अमोल पन्हाळकर आदी उपस्थित होते.
घटनास्थळी जुन्नर उपवनसंरक्षक अधिकारी अमोल सातपुते, सहाय्यक उपस्थित संरक्षक अधिकारी अमित भिसे यांनी भेट दिली .

वनविभागाच्या कारभाराबाबत नाराजी
सर्वसामान्य माणसाला शेतकऱ्याला वनविभागाच्या संबंधित कामासाठी हेलपाटे मारायला लावणाऱ्या जुन्नरच्या वन विभागाच्या कारभाराबाबत मात्र यावेळी ग्रामस्थांनी नाराज व्यक्त केली. आम्हाला कागदी घोडे नाचत नियम शिकविणारे साहेब आता कुठे आहेत असा संतप्त सवाल ग्रामस्थांनी केला.

00304