टाकळी हाजीमध्ये डिजेचा दणदणाट

टाकळी हाजी : सध्या लग्नसराईचे दिवस सुरू असून टाकळी हाजी व परिसरात विविध विवाह सोहळे धूमधडाक्यात साजरे केले जात आहेत. मात्र, या समारंभामध्ये वापरल्या जाणाऱ्या डीजे साउंड सिस्टीममुळे नागरिक त्रस्त झाले आहेत. विशेषतः शाळकरी मुले, ज्येष्ठ नागरिक आणि रुग्णांना या आवाजाचा त्रास सहन करावा लागत आहे.
प्रत्येक लग्नाची मिरवणूक ही टाकळी हाजी गावातून काढण्यात येते. ती पेठेतून एक ते दोन तास चालते. डीजेचा आवाज प्रचंड मोठा करून तरुणाई बेफान होऊन नाचत असते. रात्री उशिरापर्यंत सुरु राहणाऱ्या लग्नाच्या वरातीच्या कार्यक्रमांमुळे परिसरात गोंधळाचे वातावरण निर्माण होत आहे. याबाबत नागरिकांनी नाराजी व्यक्त केली असून पोलिस प्रशासनाने याकडे लक्ष देण्याची गरज आहे.
दरम्यान, ध्वनी प्रदूषण नियंत्रण कायद्यानुसार रात्री १० नंतर डीजे वाजवण्यास बंदी असून त्याचे उल्लंघन केल्यास संबंधितांवर कारवाई होऊ शकते. ज्या व्यक्तींनी डीजेचा वापर करायचा आहे, त्यांनी कायद्याच्या चौकटीत राहूनच कार्यक्रम साजरे करावेत असे आवाहन शिरूर पोलिस ठाण्याचे पोलिस निरीक्षक संदेश केंजळे यांनी केले आहे.