बांधकाम मजूराचा टाकळी येथे मृत्यू

टाकळी हाजी, ता.१२ : टाकळी हाजी (ता. शिरूर) येथील टाकळी हाजी–शिरूर रस्त्यावर इंदिरा नगर परिसरात बुधवारी (ता. ९ ) सायंकाळी साडेसात वाजण्याच्या सुमारास दुचाकी अपघातात एक २२ वर्षीय बांधकाम मजुराचा मृत्यू झाला हितेश इंदल शाहू असे त्याचे नाव असून छत्तीसगड येथील रहिवासी आहे.
याबाबत पोलिसांनी दिलेली माहिती अशी की, हितेश इंदल शाहू (रा. नवगाव करंजीया, ता. व जि. बेमीतेरा, छत्तीसगड) हा गेल्या काही महिन्यांपासून टाकळी हाजी येथे बांधकाम मजूर म्हणून कार्यरत होता. तो त्याचा सहकारी दिलीप रामकिसन निशाद (वय ३१, रा. टाकळी हाजी, मुळ रा. धनगाव, जि. बेमीतेरा, छत्तीसगड) याच्यासोबत काम करत होता. अपघाताच्या दिवशी संध्याकाळी तो दुचाकीवरून जात असताना कुत्रे आडवे गेल्याने हितेश रस्त्यावर कोसळला व गंभीर जखमी झाला. त्याला तातडीने शिरूर येथील ग्रामीण रुग्णालयात दाखल करण्यात आले. टाकळी हाजी प्राथमिक आरोग्य केंद्राचे डॉ प्रियांका घुगे, डॉ. नामदेव पानगे, भरत सोदक, शिवाजी पोकळे यांनी वेळेवर उपचार मिळण्यासाठी प्रयत्न केला, मात्र उपचारापूर्वीच हितेशचा मृत्यू झाला.