टाकळीत डाळिंबाच्या पूर्व मशागतीस वेग

टाकळी हाजी, ता. १ : टाकळी हाजी (ता. शिरूर) परिसरातील बेट पट्ट्यात डाळिंबाच्या पुढील बहारासाठी पूर्व मशागतीच्या कामांना वेग आला आहे. बागांमध्ये सध्या काटेकोर छाटणी, फवारणी आणि सेंद्रिय-रासायनिक खत व्यवस्थापन सुरू असून, शेतकऱ्यांचा कल आधुनिक शेतीकडे अधिक स्पष्टपणे जाणवत आहे.

टाकळी परिसराला घोड आणि कुकडी नद्यांची जलसंपदा, तसेच मुरमाड जमीन यांचा विशेष लाभ मिळतो. त्यामुळे येथे दर्जेदार आणि निर्यातक्षम डाळिंबाचे उत्पादन यशस्वीरीत्या घेतले जाते. हजारो हेक्टर क्षेत्रावर डाळिंबाच्या बागा फुलल्या असून, या माध्यमातून अनेक शेतकऱ्यांनी आपली आर्थिक स्थिती भक्कम केली आहे.
एप्रिल-मे दरम्यान फळतोड पूर्ण झाल्यानंतर लगेचच पुढील बहारासाठीचे नियोजन सुरू होते. सध्या बागांमध्ये पुन्हा छाटणी, अन्नद्रव्य व्यवस्थापन आणि फवारणीसाठी कामे सुरू आहेत. यासाठी विदर्भातील मजूर मोठ्या प्रमाणावर कामासाठी दाखल होत असून, वर्षभर या भागात हजारो मजुरांना रोजगाराची संधी मिळते.
विशेष म्हणजे, या भागातील अनेक तरुण शेतकरी पारंपरिक नोकरीच्या मागे न लागता आधुनिक तंत्रज्ञानाचा वापर करत उच्च उत्पादनक्षम शेती करत आहेत. योग्य नियोजन, वेळेवर प्रक्रिया आणि नवतंत्राचा वापर यामुळे डाळिंबाच्या माध्यमातून देशी-विदेशी बाजारपेठांमध्ये स्वतःची ठसा उमठवणारे शेतकरी तयार झाले आहेत.

डाळिंबाचे नियोजन काटेकोरपणे केल्यास त्यामधून कांदा व इतर भाजीपाला पिकांपेक्षा निश्चितच चांगला आर्थिक फायदा मिळतो. त्यामुळे तरुण शेतकरी डाळिंब शेतीकडे वळत आहे.
- ज्ञानेश्वर गावडे, डाळिंब मार्गदर्शक
00613