टाकळी हाजीत नवरात्रानिमित्त हरिनाम सप्ताह

टाकळी हाजी, ता. १ : टाकळी हाजी (ता. शिरूर) येथील जागृत देवस्थान असलेल्या श्री मळगंगा देवीच्या दर्शनासाठी भाविकांची गर्दी होत आहे.
नवरात्र उत्सवाच्या निमित्ताने ग्रामस्थांच्या वतीने येथे अखंड हरिनाम सप्ताहाचे आयोजन करण्यात आले होते. पहाटे पावणे सहा वाजत देवीची महापूजा आरती होते, या साठी हजारो भाविक गर्दी करतात त्यामध्ये महिलांची संख्या लक्षणीय असते.
विजया दशमीच्या निमित्ताने टाकळी हाजी गावातून पालखीची मिरवणूक निघणार असून, दुपारी या पालखीचे आगमन मळगंगा मंदिर परिसरात होणार आहे.
या वर्षी पाऊस समाधानकारक रित्या झाल्यांने शेतकरी वर्गाचे कामे उरकलेली असून, मशागत बंद आहे. तसेच जगप्रसिद्ध रांजणखळगे पाण्याने भरून वहात असून त्याला झुलत्या पुलाची जोड मिळत असल्याने भाविक पर्यटक सेल्फी काढण्याचा आनंद घेत आहेत.
अडीच महिने बंद असलेला पूल भाविकांची गरज लक्षात घेऊन सुरू केला. बुधवारी लेखा परीक्षण अभियंता सिद्धार्थ शिंदे यांनी पहाणी केली. त्यांच्या समावेत शाखा अभियंता अनिल गावडे, ग्रामविकास अधिकारी राजेंद्र खराडे उपस्थित होते. त्यांचा अहवाल लवकर जिल्हा परिषदेच्या बांधकाम विभागाला दिला जाईल असे सिद्धार्थ शिंदे यांनी सांगितले.