गुंडांकडून महिलेची जमीन बळकावण्याचा प्रयत्न

थेऊर, ता. १२ : पूनावाला ग्रुप ऑफ कंपनीचे नाव सांगून काही गुंडांनी महिलेची जमीन बळकावण्याचा प्रकार थेऊर (ता. हवेली) येथे उघडकीस आला आहे. याबाबत शेतकरी महिलेने लोणी काळभोर पोलिस ठाण्यात तक्रार दिली आहे. या गुंडांवर पोलिस प्रशासन काय कारवाई करणार? याकडे जनतेचे लक्ष लागले आहे.
थेऊर ग्रामपंचायत हद्दीतील गट नंबर १२२ मधील काही क्षेत्र जयश्री पवार यांनी योहान पूनावाला यांच्याकडून खरेदीखताने विकत घेतले आहे. मात्र नरेंद्र पाटील नामक व्यक्तीने कपिल पवार यांच्या गुंड टोळीला शेतजमिनीचा ताबा घेण्याची सुपारी दिली आहे. त्यानुसार काहीजण टोळक्याने गट नंबर १२२ मध्ये बेकायदेशीर ताबा घेण्यासाठी घुसले. यावेळी पवार यांनी पोलिसांना माहिती दिली. पोलिस आल्याने सर्वजण निघून गेल्याचे जयश्री पवार यांच्या तक्रारीत नमूद केले आहे.
पवार यांची थेऊर (ता. हवेली) येथील जमीन पूर्व दिशेला आहे. मात्र बलाढ्य कंपनीच्या गुंडांनी बेकायदा ताबा घेण्यासाठी पूर्व दिशेची जमीन पश्‍चिम दिशेला असल्याचे भूमिअभिलेखाच्या नकाशात दाखवत आहेत. दरम्यान, पवार यांच्या गुंड टोळीने पवार या गुंडांच्या धमकीमुळे घाबरल्या असून त्यांनी या प्रकरणी लोणी काळभोर पोलिस ठाण्यात तक्रारी अर्ज दिला आहे. मात्र पूनावाला यांचे नाव वापरून शेतकरी महिलेवर जमीन विकण्यासाठी दबाव टाकला जात आहे असा आरोप स्थानिक शेतकऱ्यांनी बोलताना केला आहे.

पूनावाला यांचे नाव सांगून त्यांचे प्रतिनिधी येथील शेतकऱ्यांना मागेल ती किंमत देतो. मात्र जमिनी आमच्या मार्फतच विकायच्या असे धमकावत आहेत.
- भरत कुंजीर, माजी उपसरपंच, थेऊर

जयश्री पवार यांनी तक्रारी अर्ज दिलेला आहे. एकाच गटात पवार आणि इतरांची जमीन आहे. काहीजण कंपाउंड करण्यासाठी आले होते. त्याबाबत सर्व कागदपत्रांची शहानिशा करून कार्यवाही करण्यात येईल.
राजेंद्र पन्हाळे, वरिष्ठ पोलिस निरीक्षक, लोणी काळभोर ठाणे