‘विशेष मोहिमेद्वारे सातबारा दुरुस्ती कामे मार्गी लावा’

थेऊर, ता. ३ : हवेली तालुक्यात सातबारा दुरुस्तीसंदर्भातील कामे महसूल विभागाने नियमित मोहीम राबवून प्राध्यान्याने पूर्ण करावीत, अशा सूचना हवेलीचे उपविभागीय महसूल अधिकारी डॉ. यशवंत माने यांनी दिल्या. महसूल दिनानिमित्त हवेली महसूल विभागाच्या वतीने १ ते ७ ऑगस्टदरम्यान आयोजित महसूल सप्ताहाच्या शुभारंभ कार्यक्रमात ते बोलत होते. या वेळी सर्वोत्कृष्ट कर्मचारी पुरस्कार वितरण आणि सेवानिवृत्त कर्मचाऱ्यांचा सत्कार करण्यात आला. कार्यक्रमास तहसीलदार किरण सुरवसे, नायब तहसीलदार सचिन आखाडे, स्वाती नरुटे, आजिनाथ गाजरे, अमोल कदम, राज्य महाराष्ट्र कर्मचारी संघटनेचे अध्यक्ष दीपक चव्हाण उपस्थित होते.
तहसीलदार सुरवसे म्हणाले, हवेली तालुक्यातील महसूल संदर्भात प्रलंबित कामे मार्गी लावण्यासाठी सूचना दिल्या आहेत. कोंढवे -धाडवे परिसरात अतिक्रमण धारकांसाठी विशेष मोहीम राबविण्यात येणार आहे. तसेच मोरदरावाडी, रांझे ते कोंढणपूर रस्ता परिसरात वृक्षारोपण कार्यक्रम हाती घेणार आहे. महाराजस्व अभियानाअंतर्गत कोथरूड येथे महाराजस्व अभिमान कार्यक्रम होणार आहे.