शेतीच्या वादातून मारहाणप्रकरणी तरडे येथे ७ जणांवर गुन्हा दाखल

थेऊर, ता. ३ : न्यायालयात वाद सुरू असताना देखील शेतात अतिक्रमण करून दोन सख्ख्या भावांसह ५ जणांना शिवीगाळ, मारहाण करून जीवे ठार मारण्याची धमकी दिल्याची घटना तरडे (ता. हवेली) ग्रामपंचायत हद्दीतील गट क्रमांक २४८ मध्ये गुरुवारी (ता. ३१) सकाळी आठ वाजण्याच्या सुमारास घडली. या मारहाणीत दोघेजण गंभीर जखमी झाले आहेत. याप्रकरणी लोणी पोलिस ठाण्यात ७ जणांवर गुन्हा दाखल करण्यात आला असून, पोलिसांनी तीन जणांना अटक केली आहे. याप्रकरणी लक्ष्मण गडदे यांनी फिर्याद दिली आहे.
या मारहाणीत लक्ष्मण राघू गडदे (वय ५५) व शिवा राघू गडदे (रा. तरडे, ता. हवेली) अशी गंभीर जखमी झालेल्या सख्ख्या भावांची नावे आहेत. या भांडणात बबन लक्ष्मण गडदे, श्रीकांत लक्ष्मण गडदे व दत्ता नामदेव गडदे हे किरकोळ जखमी झाले आहेत. अंकुश रामभाऊ बरकडे (वय ४८), लहू रामभाऊ बरकडे (वय ४८), राजू रामभाऊ बरकडे (वय ४२), राहुल लहू बरकडे (वय २४), आदेश अंकुश बरकडे (वय १९), तुषार अंकुश बरकडे (वय २२) व गणेश लहू बरकडे (वय २०, सर्व रा. तरडे, ता. हवेली) यांच्यावर गुन्हा दाखल झाला आहे.
पोलिसांनी दिलेल्या माहितीनुसार, फिर्यादी लक्ष्मण व शिवा गडदे हे दोघे भाऊ तरडे परिसरात कुटुंबासोबत राहतात. गडदे व आरोपी यांच्यामध्ये गट क्रमांक २४८ च्या जमिनीवरून वाद आहे. हा वाद न्यायप्रविष्ट असल्याने न्यायालयाने याला स्टे दिला आहे. दरम्यान, लक्ष्मण गडदे यांना भाऊ शिवा गडदे यांनी गुरुवारी सकाळी आठ वाजण्याच्या सुमारास फोन करून सांगितले की, आपल्या शेतात कोणीतरी ट्रॅक्टरच्या साहाय्याने पेरणी करीत आहेत. त्यानंतर फिर्यादी लक्ष्मण गडदे, भाऊ शिवा, मुलगा बबन, श्रीकांत गडदे, पुतण्या दत्ता गडदे हे तेथे जाऊन विचारपूस केली असता, आरोपींनी संगनमत करून फिर्यादी व त्यांच्या नातेवाइकांना शिवीगाळ करून लाकडी दांड्याने मारहाण करत केली व जीवे मारण्याची धमकी दिली.
लोणी काळभोर पोलिसांनी अंकुश बरकडे, तुषार बरकडे, राजू बरकडे या तिघांना अटक केली आहे. चार आरोपी फरार आहेत. पुढील तपास पोलिस उपनिरीक्षक दिगंबर सोनटक्के करीत आहेत.