पिकअप चालकाकडून विवाहितेचा विनयभंग

थेऊर, ता. ११ : पिकअप चालकाने विवाहितेकडे शरीरसुखाची मागणी करून छेडछाड केल्याची घटना थेऊर (ता. हवेली) येथील गाढवे वस्ती परिसरात शुक्रवारी (ता. ८) रात्री सव्वाअकरा वाजण्याच्या सुमारास घडली. नंदू जाधव (वय २५, जाधव वस्ती, थेऊर), असे आरोपीचे नाव आहे. याप्रकरणी एका २६ वर्षीय विवाहितेने लोणी काळभोर पोलिस ठाण्यात फिर्याद दिली आहे. त्यानुसार लोणी काळभोर पोलिस ठाण्यात विनयभंगाचा गुन्हा दाखल केला आहे.
पोलिसांनी दिलेल्या माहितीनुसार, फिर्यादी व त्यांची जाऊ एकाच ठिकाणी नोकरी करतात. नेहमीप्रमाणे त्या व त्यांची जाऊ शुक्रवारी कामाला गेल्या होत्या. कामावरून सुट्टी झाल्यानंतर रात्री अकरा वाजण्याच्या सुमारास थेऊर फाटा येथे घरी जाण्यासाठी वाहनाची वाट पाहत थांबल्या होत्या. त्याचवेळी नंदू जाधव हा पिकअप घेऊन थेऊर फाट्याकडून थेऊरच्या दिशेने चालला होता. जाधव फिर्यादींना म्हणाला, ‘घराकडे सोडवितो, गाडीत बसा.’ तेव्हा फिर्यादी यांनी गाडीत बसण्यास होकार दिला. गाडीत बसल्यानंतर सदर पिकअप थेऊर फाटा रेल्वे उड्डाणपूल ओलांडून गाढवे वस्ती जवळ आला. त्यावेळी जाधव याने अंधाराचा गैरफायदा घेऊन फिर्यादी यांच्याशी गैरवर्तन केले. त्यावर त्यांनी गाडीतून उतरण्याचा निर्णय घेतला व, ‘तुझे काय पैसे झाले असेल ते भाडे घे, मात्र आम्हाला येथे उतरू दे,’ असे सांगितले. तेव्हा आरोपीने फिर्यादीच्या मनात लज्जा उत्पन्न होईल, असे गैरवर्तन केले.
याबाबतचा पुढील तपास लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक रत्नदीप बिराजदार करीत आहेत.