कुंजीरवाडी येथून दुचाकीची चोरी

थेऊर, ता. ४ : कुंजीरवाडी (ता. हवेली) येथील प्राथमिक आरोग्य केंद्राच्या परिसरात परिचारिकेने लावलेली नवीन दुचाकी चोरट्याने चोरून नेल्याची घटना घडली आहे. ही घटना मंगळवारी (ता.२) दुपारी एक वाजण्याच्या सुमारास उघडकीस आली आहे. याप्रकरणी वैशाली हरिशचंद्र दुर्गाडे (वय ४५, व्यवसाय नोकरी, रा. पापडे वस्ती, बेकराई नगर, सिंहगड कॉलनी, हडपसर पुणे) यांनी लोणी काळभोर पोलिस ठाण्यात फिर्याद दिली आहे. त्यानुसार चोरट्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, दुर्गाडे या कुंजीरवाडी प्राथमिक आरोग्य केंद्रात परिचारिका म्हणून काम करीत आहेत. त्यांनी काहीच दिवसांपूर्वी टीव्हीएस ज्युपिटर दुचाकी (क्र. एम १२ वायएफ १७३९) विकत घेतली होती. दुर्गाडे या नेहमीप्रमाणे मंगळवारी सकाळी कामावर आल्या होत्या. तेव्हा त्यांनी प्राथमिक आरोग्य केंद्राजवळ दुचाकी लावली होती. दुर्गाडे यांनी दुपारी एक वाजण्याच्या सुमारास लावलेली दुचाकी पाहिली असता, त्यांना ती मिळून आली नाही. त्यांनी दुचाकीचा परिसरात शोध घेतला पण ती दिसून आली नाही. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस हवालदार रामहरी वणवे करीत आहेत.