कदमवाकवस्तीत जुन्या वादातून दोघांना मारहाण; चौघांवर गुन्हा

थेऊर, ता. १० : जुन्या वादाचा राग मनात धरून दोघांना शिवीगाळ करून लोखंडी रॉडने मारहाण केल्याची घटना कदमवाकवस्ती (ता. हवेली) येथील घोरपडेवस्ती परिसरात असलेल्या चिंतामणी प्लॉटींगजवळ बुधवारी (ता. ८) रात्री बारा वाजण्याच्या सुमारास घडली. या मारहाणीत एकजण जखमी झाला. याबाबत लोणी काळभोर पोलिस ठाण्यात चार जणांवर गुन्हा दाखल केला असून, पोलिसांनी तत्काळ दोघांना अटक केली.
सद्दाम इरफान अन्सारी (वय २१) व अब्दुल ऊर्फ अबू इरफान अन्सारी (वय २३, दोघेही रा. इंदिरानगर, कदमवाकवस्ती) अशी अटक केलेल्या आरोपींची नावे आहेत. अकीब इक्बाल अन्सारी (वय २६, रा. इंदिरानगर, कदमवाकवस्ती) व पियुष (पूर्ण नाव पत्ता माहिती नाही) अशी गुन्हा दाखल केलेल्या आरोपींची नावे आहेत. तर, गणेश सदाफुले असे जखमी झालेल्या तरुणाचे नाव आहे. याप्रकरणी आतीष विनोद झेंडे (वय १८, रा. इंदिरानगर, कदमवाकवस्ती) याने लोणी काळभोर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी आतीष झेंडे व आरोपी यांच्यामध्ये काही महिन्यांपूर्वी भांडणे झाली होती. याच राग मनात धरून आरोपींनी फिर्यादी आतीष झेंडे याचा मित्र गणेश सदाफुले यास लोखंडी हत्याराच्या मागील बाजूने व लोखंडी रॉडने मारहाण केली. तर, आतीष झेंडे यालाही लाथाबुक्क्यांनी मारहाण करून धमकी दिली. या मारहाणीत गणेश सदाफुले हा जखमी झाला आहे.