लोणी काळभोरला आढळला अनोळखी व्यक्तीचा मृतदेह

थेऊर, ता. २९ : लोणी काळभोर (ता. हवेली) येथे रेल्वे कर्मचारी रुळाची दुरुस्ती करीत होते. त्यावेळी त्यांना अनोळखी व्यक्तीचा मृतदेह रेल्वे लाईनजवळ आढळून आला. ही घटना लोणीतील माळी मळा परिसरातील शेल पेट्रोल पंपांच्याजवळ रेल्वे लाइनवर घडली. हा प्रकार मंगळवारी (ता.२९) सकाळी साडे अकरा वाजण्याच्या सुमारास उघडकीस आली आहे.

मिळालेल्या माहितीनुसार, ही माहिती रेल्वे कर्मचाऱ्यांनी तत्काळ लोहमार्ग व लोणी काळभोर पोलिसांना दिली. या घटनेची माहिती मिळताच, लोणी काळभोर पोलिस ठाण्याचे पोलिस हवालदार विजय जाधव, केतन धेंडे, राणी खामकर व बीट मार्शल वैभव खोत आणि लोहमार्ग पोलिस हवालदार शेख मन्सूर अब्दुल करीम हे घटनास्थळी दाखल झाले.
पोलिसांनी मृतदेह ताब्यात घेऊन शवविच्छेदन करण्यासाठी रुग्णवाहिकेतून पुण्याला पाठविला. शवविच्छेदनाचा अहवालानंतर मृत्यूचे खरे कारण कळेल. हा इसम परप्रांतीय असून रेल्वेतून पडून मृत्यू झाल्याचा प्राथमिक अंदाज पोलिसांनी वर्तविला आहे. दरम्यान, अनोळखी इसामाबाबत जर कोणाला काही माहिती मिळाल्यास त्यांनी लोणी काळभोर पोलिस ठाण्याच्या ०२०- २९९९५२६० या क्रमांकावर संपर्क साधावा, असे आवाहन वरिष्ठ पोलिस निरीक्षक राजेंद्र पन्हाळे यांनी केले आहे.