महात्मा गांधी विद्यालयाचे क्रीडा स्पर्धांत यश

उरुळी कांचन, ता. ३ : क्रीडा व युवक सेवा संचालनालय महाराष्ट्र राज्य व जिल्हा क्रीडा अधिकारी कार्यालय पुणे यांच्यावतीने घेण्यात आलेल्या १४ व १७ वर्षीय मुले व मुलींच्या जिल्हास्तरीय आटापाट्या स्पर्धा मंगळवार (ता. २५) नोव्हेंबर ते बुधवार (ता. २६) जिल्हा क्रीडा संकुल बारामती येथे झाल्या. स्पर्धेमध्ये विद्यालयातील १७ वर्षे वयोगट मुलांच्या संघाचा तृतीय क्रमांक, १७ वर्षे वयोगट मुलींच्या संघाचा द्वितीय तर १४ वर्षे वयोगट मुलींचा प्रथम क्रमांक आला. तसेच विभागीय स्पर्धेसाठी या संघांची निवड केली. या संघांना क्रीडा अध्यापक राजू माने यांनी मार्गदर्शन केले.
बॉक्सिंग फेडरेशन डेव्हलपमेंट ऑफ इंडियातर्फे आठवे नॅशनल बॉक्सिंग चॅम्पियन्स स्पर्धा २१ ते २४ नोव्हेंबर २५ रोजी दिल्ली येथे झाल्या. यामध्ये विद्यालयाची छोटी बॉक्सर कुमारी हरमनप्रीत रणजित सिंग सोहता हिने प्रथम क्रमांक पटकावून राष्ट्रीय स्पर्धेत गोल्ड मेडल मिळविले. तसेच फैजान शकील शेख इयत्ता दहावी या विद्यार्थ्यांने द्वितीय क्रमांक मिळवीत राष्ट्रीय स्पर्धेत सिल्वर मेडल मिळविले.
वाघोली इंडिया गेट बॉक्सिंग फेडरेशन व ५९ व्या अस्मिता किक बॉक्सिंग लीग २०२५ स्पर्धा १५ नोव्हेंबर रोजी पिंपरी चिंचवड येथे पार पडली. यामध्ये विद्यालयाच्या अनुष्का अनिल गाढवे ४४ किलो वजन गटात तृतीय क्रमांक पटकावून ब्राँझ पदक मिळविले. तर दिया सुरेश कळसाईतकर हिने ३७ किलो वजन गटात ब्राँझ पदक मिळवले. या सर्व यशस्वी खेळाडूंचा विद्यालयाच्या वतीने प्राचार्य भारत भोसले व उपप्रमुख वि. द. काशीद यांनी तसेच महात्मा गांधी सर्वोदय संघाच्या पदाधिकाऱ्यांनी अभिनंदन केले.