ओतूरला बिबट्याच्या हल्ल्यात एकजण जखमी

ओतूर, ता. ११ : ओतूर (ता. जुन्नर) येथे बुधवारी पहाटे पाचच्या सुमारास उघड्यावर प्रात:विधी (शौच) करणाऱ्या एका व्यक्तीवर बिबट्याने हल्ला करून त्यास जखमी केल्याची माहिती वनपरिक्षेत्र अधिकारी लहू ठोकळ यांनी दिली.
गुरुनाथ किसन वाघ (वय २७, रा. कातकरी वस्ती, ओतूर) असे बिबट्याच्या हल्ल्यात जखमी झालेल्या व्यक्तीचे नाव आहे. याबाबत वनविभागाला ओतूरचे सरपंच प्रशांत डुंबरे यांनी माहिती दिली. सदर व्यक्तीस ओतूर प्राथमिक आरोग्य केंद्रात दाखल करण्यात आले. सदर व्यक्तीच्या उजव्या खांद्यावर बिबट्याचा एक दात लागला असून डाव्या हाताला पंजा लागल्याने खरचटल्याची माहिती डॉक्टरांनी दिली. जखमी व्यक्तीला पुढील उपचारासाठी वनविभागाकडून नारायणगाव ग्रामीण रुग्णालयात नेण्यात आले आहे.
वनपरिक्षेत्र अधिकारी एल. व्ही. ठोकळ यांच्या मार्गदर्शनाखाली ओतूरची वनपाल एस. एम. बुट्टे, वनरक्षक व्ही. ए. बेले, वनकर्मचारी किशन केदार, फुलचंद खंडागळे, साहेबराव पारधी यांनी सदर ठिकाणी पिंजरा लावून स्वसंरक्षणार्थ उपाययोजनेची माहिती दिली.