इंदापूर तहसील कार्यालयात माहिती अधिकार दिन साजरा

उद्धट, ता. ४ : इंदापूर तहसील कार्यालयात माहिती अधिकार दिन उत्साहात साजरा झाला. राज्यपातळीवर २८ सप्टेंबर हा दिवस माहिती अधिकार दिन म्हणून साजरा केला जातो, परंतु शनिवारी (ता. २८) शासकीय सुट्टी असल्याने हा दिन सोमवारी (ता. ३०)साजरा करण्यात आला.
‘‘जिल्ह्यातील शासकीय कर्मचाऱ्यांना माहिती अधिकाराच्या प्राप्त झालेल्या अर्जावर सकारात्मक पाहण्याची आवश्यकता आहे. त्याचबरोबर आलेल्या अर्जाचे गांभीर्य लक्षात घेऊन त्यावर वेळेत कार्यवाही करावी, असे आवाहन इंदापूर येथील सामाजिक कार्यकर्ते गांधले गुरुजी यांनी केले.
इंदापूर तहसीलदार जिवन बनसोडे म्हणाले की, या कायद्याच्या संदर्भात महाराष्ट्र शासनाने वेळोवेळी प्रसिद्ध केलेले शासन निर्णय सर्वांनी पाहावेत. त्यानुसार काय करायला नको, यावर भर द्यायला हवा. जाणूनबुजून माहिती देण्यास टाळाटाळ करू नये. एका वेळेला एका अर्जातून एकाच प्रकारची माहिती द्यावी. पहिल्या क्रमांकाची माहिती यामध्ये देणे आवश्यक आहे. कायद्यातील तरतुदी पाहून सकारात्मक दृष्टिकोनातून अर्जावर कार्यवाही करावी आणि असे अर्ज निर्गत करावेत. शासनाने वेळोवेळी प्रकाशित केलेले शासन निर्णय त्यामधील तरतुदी आणि सकारात्मक उद्देश ठेवून अशा अर्जांचे वेळेत निराकरण होईल, हे पाहावे. कायद्यामध्ये डोकावल्यास प्रत्येक गोष्टीला उत्तर मिळेल, हीच सकारात्मक बांधिलकी प्रशासनात असावी.
याप्रसंगी पुरवठा निरीक्षक अनुप बनसोड, अप्पासाहेब सपकळ, संघटक शत्रुघ्न घाडगे, अजीजभाई तांबोळी यांच्यासह तहसील कार्यालयातील सर्व अधिकारी व कर्मचारी उपस्थित होते. नायब तहसीलदार अविनाश डोईफोडे यांनी या कार्यक्रमाचे आयोजन केले होते.