जांब येथे मतदान जनजागृती अभियान

उद्धट, ता. २२ : जिल्हा परिषद प्राथमिक शाळा जांब (ता. इंदापूर) येथे ‘मतदान जनजागृती अभियाना’चे आयोजन शनिवारी (ता. १९) केले होते. नोव्हेबर महिन्यात होणाऱ्या आगामी विधानसभा निवडणुकीच्या पार्श्वभूमीवर लोकांनी शंभर टक्के मतदान करून देशाचे जागरूक नागरिक व्हावे, यासाठी जिल्हा परिषद शाळेकडून मतदान जनजागृती कार्यक्रमाचे आयोजन केले होते.
यामध्ये मतदार जनजागृती रॅली, तसेच मतदार राजा जागा हो लोकशाहीचा धागा हो, सोडा सारे काम धाम मतदान करणे पहिले काम यासारख्या घोषणा देत, १८ वर्षे पूर्ण झालेल्या प्रत्येक नागरिकांनी मतदान करून देशाचे जागरूक नागरिक बनण्याची विनंती बालचमुंकडून करण्यात आली. त्यानंतर मतदान प्रतिज्ञा घेण्यात आली.
या दरम्यान मतदान जनजागृतीसाठी रांगोळी स्पर्धा, वक्तृत्व स्पर्धा, निबंध स्पर्धेचे शाळेमध्ये आयोजन केले होते. शाळेच्या मुख्याध्यापिका सुजाता शेंडगे यांनी मतदानाचे महत्त्व पटवून दिले. या कार्यक्रमांमध्ये अंगणवाडी सेविका, मदतनीस, तसेच शाळेतील शिक्षक बबनराव आटोळे सहभागी झाले होते.