भैरवनाथ विद्यालयात निवडणूक प्रक्रिया

उंडवडी, ता. १३ : उंडवडी कडेपठार (ता. बारामती) येथील श्री भैरवनाथ जनसेवा विद्यालयात इयत्ता १० वीच्या वर्गाने निवडणूक प्रक्रियेचा अनुभव घेतला. विद्यार्थ्यांना लोकशाही पद्धतीने होणाऱ्या प्रत्यक्ष निवडणुकीचा अनुभव यावा आणि त्यांना ही प्रक्रिया समजण्यास मदत व्हावी, या उद्देशाने विद्यालयाच्या वतीने ही उपक्रम राबविण्यात आला. यामध्ये निवडणुकीचा कार्यक्रम जाहीर करणे, फॉर्म भरणे, पॅनल, मतदान अधिकारी कामे, मतपत्रिका, मतदान कक्ष, मतपेटीपासून ते मतदान झाल्यानंतर मतमोजणी करण्याबाबतच्या सर्व प्रक्रियेचे मार्गदर्शन शिक्षकांनी विद्यार्थ्यांना केले. त्यानंतर विद्यालयात विजयी उमेदवारांचा शपथग्रहण सोहळाही पार पडला. मुख्याध्यापक वल्लभ चौधरी व भैरवनाथ शिक्षण मंडळाचे अध्यक्ष अशोक साळुंके यांनी या उपक्रमाचे कौतुक केले.