राज्य परिवहन विभागाचा निष्काळजीपणा

उंडवडी, ता. २२ : राज्य परिवहन विभागाच्या कामकाजातील निष्काळजीपणाचे आणखी एक उदाहरण बारामतीत उघड झाले आहे. बारामती तालुक्यातील सोनवडी सुपे येथील दाऊद सय्यद यांच्या मालकीचा टेम्पो कधीच बीड जिल्ह्यात गेला नसतानाही, बीड आरटीओने त्यांच्या वाहनावर दंड ठोठावला. मात्र ही बाब त्यांच्या वाहनाच्या नियमित पासिंगसाठी ते बारामती आरटीओ कार्यालयात गेले असता उघड झाली. सुदैवाने बारामती येथील आरटीओ अधिकाऱ्यांनी तातडीने चलनातील टेम्पो वेगळा असल्याचा तपास करून हा दंड चुकीचा असल्याचे मान्य केले व बीडच्या आरटीओ कार्यालयाला संपर्क करून पत्र पाठवून वाहनमालकाला दिलासा दिला आहे.
सोनवडी सुपे येथील दाऊद सय्यदलाल सय्यद यांच्याकडे माल वाहतूक टाटा एसी (छोटा हत्ती) टेम्पो (क्र. एमएच ४२ एक्यू २२८६) आहे. ते मागील आठवड्यात टेम्पो पासिंग करण्यासाठी बारामती आरटीओ कार्यालयात गेले. यावेळी संगणक प्रणालीत त्यांच्या टेंपोवर बीड जिल्ह्यात वाहतूक नियमभंगाचा दंड झाल्याचे नोंदवले गेले होते. ही बाब पाहून सय्यद थक्क झाले. त्यांच्या टेम्पोने कधीच बीड जिल्ह्याच्या हद्दीत प्रवेश केलेला नव्हता, तरीदेखील त्यांच्या वाहन क्रमांकावर थेट दंड दाखवण्यात आला होता. विशेष म्हणजे संबंधित चलनात एका आयशर टेम्पोचा फोटो जोडलेला होता; मात्र तो टेम्पो दाऊद सय्यद यांचा नव्हता. चुकीचा फोटो आणि वाहन क्रमांक एकसारखाच यामुळे बीड आरटीओच्या कामकाजातील हलगर्जीपणा स्पष्ट झाला आहे. मात्र याचा आर्थिक व मानसिक भुर्दंड सय्यद यांना सोसावा लागला आहे.

बीड आरटीओकडून वाहनाचा क्रमांक चुकला होता. त्यामुळे संबंधित आयशर टेम्पो ऐवजी सय्यद यांच्या टाटा एसीवर दंड पडला होता. ही बाब सय्यद यांनी आमच्या लक्षात आणून दिल्यानंतर आम्ही बीड आरटीओ अधिका-यांना संपर्क करून संबंधित टेम्पोवरील दंड हलविला आहे.
-सुरेंद्र निकम, उपप्रादेशिक परिवहन अधिकारी, बारामती