मूकबधिर मुलींसोबत साजरा केला वैष्णवीने वाढदिवस

उंडवडी, ता. ३ : वाढदिवस म्हटलं की भेटवस्तू, सहली आणि पार्टी अशाच योजना डोळ्यापुढे येतात. मात्र इंदापूर येथील वैष्णवी झगडे हिने आपला वाढदिवस समाजोपयोगी कार्यासाठी अर्पण करून वेगळाच आदर्श घालून दिला.

बारामती तालुक्यातील कऱ्हावागज येथील निवासी मूकबधिर विद्यालयात शिक्षण घेणाऱ्या पोलिसांना सापडलेल्या अनाथ मुलींना तिने आपल्या कलाकौशल्याची भेट दिली. सोशल मीडियावर या शाळेबाबत माहिती मिळाल्यानंतर वैष्णवीने संस्थेच्या प्रमुख सौ. रामेश्वरी जाधव यांच्याशी संपर्क साधला. दुसऱ्याच दिवशी ती शाळेत पोहोचली आणि मुलींना नथ बनवणे, मोत्यांचे अलंकार तयार करणे या दागिन्यांच्या कलेचे प्रशिक्षण दिले.
‘‘अशा सामाजिक बांधिलकीची गरज आजच्या तरुणाईला आहे. वैष्णवीचे कार्य सर्वांनी आदर्श म्हणून घ्यावे,’’ असे संस्थेच्या प्रमुख रामेश्वरी जाधव यांनी सांगितले.