बेबी कालव्यात मोटार कोसळून एकाचा मृत्यू

उरुळी कांचन, ता. २३ : शिंदवणे (ता. हवेली) येथील लोखंडी कठड्याला मोटार धडकून गुरुवारी (ता. २३) सकाळी सहाच्या सुमारास थेट बेबी कालव्यात पडली. या अपघातात अमर साहेबराव घाडगे (वय २८, रा. जुन्नर) याचा मृत्यू झाला तर आदित्य महादेव तावरे (वय २०, रा. जुन्नर) व गणेश संजय थोरात (वय २२), शुभम शंकर इंगोले (वय २१ रा. दोघेही, केसनंद, वाघोली, ता. हवेली) हे तिघे जखमी झाले.

पोलिसांनी दिलेल्या माहितीनुसार, शुभम, गणेश, अमर तसेच आदित्य हे चौघेजण बकऱ्या विकण्याचा व्यवसाय करतात. ते चारचाकी घेऊन गुरुवारी फलटण येथील बाजारात बकरी खरेदीसाठी निघाले होते. त्यापैकी अमर मोटार चालवीत होता. त्याच्याशेजारी पुढे एक जण आणि दोघे मागे बसले होते. सकाळी सहाच्या सुमारास शिंदवणे ग्रामपंचायत हद्दीतील बेबी कालव्याजवळून जात असताना अमरचे मोटारीवरील नियंत्रण सुटले व मोटार थेट लोखंडी कठडा तोडून पाण्यात कोसळली. यावेळी स्थानिक नागरिक बाळा महाडीक, वैभव कदम आणि त्यांचे सहकारी यांनी कालव्यात उड्या मारून चौघांना बाहेर काढले. नागरिकांनी अमर याला खासगी दवाखान्यात उपचारासाठी दाखल केले असता डॉक्टरांनी त्यास उपचारापूर्वीच मृत घोषित केले.
दरम्यान, कालव्यावरील पुलाची मर्यादा संपली असून, हा पूल लवकरात लवकर नवीन बांधावा. अन्यथा आंदोलन करणार असल्याचा इशारा सरपंच गणेश महाडीक यांनी दिला आहे.

02048