देसाई महाविद्यालयात रंगला खाद्यभ्रमंती महोत्सव

उरुळी कांचन, ता. १५ : उरुळी कांचन (ता. हवेली) येथील पद्मश्री मणिभाई देसाई महाविद्यालयात गणेशोत्सवानिमित्त खाद्यभ्रमंती महोत्सवाचे आयोजन केले होते. या उपक्रमात १५०पेक्षा अधिक विद्यार्थ्यांनी सहभाग नोंदवीत विविध खाद्यपदार्थांचे ३५हून अधिक स्टॉल लावले. त्या स्टॉलच्या स्पर्धेत तेजस फरतडे, ओमकार जाधव, प्रथमेश देवकाते व रोहन कुंजीर या संगणकशास्त्राच्या प्रथम वर्षांच्या विद्यार्थ्यांच्या गटाने प्रथम क्रमांक पटकावीत बाजी मारली.
या महोत्सवात चुलीवरची ज्वारी व बाजरीची भाकरी, हिरव्या मिरचीचा झणझणीत ठेचा, पिठले, वांग्याचे भरीत, पुरणपोळी, मोदक असे एकाहून एक स्वादिष्ट पदार्थ उपलब्ध होते. या पदार्थांचा विद्यार्थी व प्राध्यापकांनी मनमुराद आस्वाद घेतला. यावेळी सहायक पोलिस उपनिरीक्षक रमेश भोसले, विश्‍वस्त संभाजी कांचन व प्राचार्य डॉ. शिवाजी बोऱ्हाडे उपस्थित होते.
यावेळी कांचन म्हणाले की, खाद्यभ्रमंती हा सांस्कृतिक वारसा व परंपरा जतन करणारा उत्सव असून त्या त्या प्रांतातील खाद्यसंस्कृतीशी त्याची नाळ जोडलेली असते. म्हणूनच जंकफूड आवडीने खाणाऱ्या युवा पिढीसाठी असे उत्सव महाविद्यालयांनी अवश्य आयोजित करावेत.
प्राचार्य डॉ. बोऱ्हाडे यांनी या उपक्रमातून व्यवस्थापन, विपणन, अर्थशास्त्र, ग्राहक यासंबंधीचे शिक्षण व प्रशिक्षण मिळत असल्याचे असे स्पष्ट केले. या कार्यक्रमाचे आयोजन सांस्कृतिक विभाग प्रमुख शुभांगी रानवडे व प्रतिक्षा कोद्रे यांनी केले होते.