पूर्व हवेलीमधील शेतकरी हतबल

उरुळी कांचन, ता. २५ : पूर्व हवेलीत पावसामुळे भाजीपाल्याचे नुकसान होत आहे. हातातोंडाशी आलेल्या पिकांचे पावसामुळे नुकसान झाल्याने शेतकरी हतबल झाले आहेत. अचानक आलेल्या वादळी पावसामुळे शिंदवणे, वळती, तरडे भागातील शेतकऱ्यांचे भाजीपाला पिकाचे मोठ्या प्रमाणात नुकसान झाल्याने या नुकसानीचा पंचनामा करून नुकसान भरपाई देण्याची मागणी शेतकरी करीत आहेत
येथील शेतात मोठ्या प्रमाणात कोथिंबीर, मेथी आणि पालक या भाजीपाल्यासह अन्य भाजीपाल्याची लागवड शेतकऱ्यांनी केलेली आहे. संततधारा पावसामुळे शेतातील पालक, कोथिंबीर, शेपू, मेथी ही भाजीपाला पिके पाण्याखाली गेली आहेत. मनोहर खेडेकर म्हणाले की, या पिकांपासून हंगामात दोन ते अडीच लाख रुपयांची आर्थिक उलाढाल होत असते मात्र या अवकाळी संततधार पावसामुळे संपूर्ण भाजीपाला जागेवरच सडून गेला आहे.''
नवीन केलेली बियाणे पेरणी पावसाने झोडपल्याने उगवले नसल्याचे शेतकरी यशवंत शितोळे म्हणाले. पावसामुळे शेतकऱ्यांचे मोठ्या प्रमाणात नुकसान झाले असल्याचे शेतकरी सचिन महाडीक म्हणाले.