उरुळीत तडीपार गुंडाची कुटुंबाला मारहाण

उरुळी कांचन, ता. १० : पुणे- सोलापूर महामार्गालगत थेऊर (ता. हवेली) येथील राखपसरे वस्ती येथे दुचाकीच्या किरकोळ अपघातातून उद्भवलेल्या वादात तडीपार गुंडाच्या टोळक्याने एका कुटुंबावर लोखंडी रॉड, दगड, विटांनी हल्ला करून मारहाण केल्याची गंभीर घटना बुधवारी (ता. ९) सकाळी अकराच्या सुमारास घडली. या घटनेत स्वप्नील काळभोर, सतीश काळभोर, गोटू शेंडगे, दिलीप काळभोर, जयश्री काळभोर आणि सिंधु काळभोर हे जखमी झाले आहेत.
या प्रकरणी सिंधु शरद काळभोर (वय ५३, रा. कुंजीरवाडी, ता. हवेली) यांनी लोणी काळभोर पोलिस ठाण्यात फिर्याद दाखल केली आहे. याप्रकरणी स्वराज राखपसरे, संजय राखपसरे, पांडा राखपसरे, अजय राखपसरे, माऊली राखपसरे (सर्व रा. राखपसरे वस्ती, थेऊर) आणि पाच- सहा अनोळखी इसमांविरोधात गुन्हा दाखल केला आहे. मात्र, घटनेनंतर तब्बल २४ तास उलटूनही एकाही आरोपीस अटक झालेली नाही.
फिर्यादी काळभोर यांचा शेती व्यवसाय असून, त्या आपल्या मुलांसह कुंजीरवाडी परिसरात राहतात. बुधवारी सकाळी गोटू शेंडगे या कामगाराने फोन करून काही व्यक्ती पुणे - सोलापूर महामार्गालगत थेऊर फाट्याजवळ माझ्या दुचाकीचा धक्का एका अनोळखी इसमाच्या दुचाकीला लागल्याने तो शिवीगाळ करून मारहाण करत असल्याचे सांगितले. या माहितीवरून सिंधू काळभोर, त्यांचा मुलगा स्वप्नील व दीर सतीश घटनास्थळी पोहोचले. तेथे शेंडगे याला आरोपी लाकडी दांडके, लाथाबुक्क्यांनी मारहाण करत होते. मध्यस्थी करण्याचा प्रयत्न करताच आरोपी स्वराज राखपसरे याने काळभोर यांना कानशिलात लगावत शिवीगाळ केली, तर पांडा राखपसरेने लोखंडी रॉडने स्वप्नीलच्या हातावर, संजय राखपसरेने सतीश काळभोर यांच्यावर हल्ला केला. अजय आणि माऊली राखपसरे यांनी जयश्री काळभोर यांनाही रॉडने मारहाण केली. यावेळी काही अनोळखी इसमांनीही दगड, विटांनी हल्ला करत टोळके घटनास्थळावरून पसार झाले. पुढील तपास पोलिस उपनिरीक्षक दिगंबर सोनटक्के करीत आहेत.

गुन्हा झालेल्या ठिकाणास प्रत्यक्ष भेट देऊन घटनास्थळी पाहणी केली आहे. दोनही बाजूचे म्हणेन ऐकून घेऊन गुन्हा दाखल करण्यात आला आहे. त्यातील काही गुन्हेगार हे तडीपार होण्याच्या मार्गावर आहेत. परिसरात दहशत निर्माण करून लोकांमध्ये भीतीचे वातावरण निर्माण करणाऱ्यांवर कडक कारवाई केली जाईल. तसेच यापूर्वी केलेल्या गुन्ह्यांची माहिती काढून पोलिस आयुक्तांपुढे सादर करण्यात येणार आहे.
- राजेंद्र पन्हाळे, वरिष्ठ पोलिस निरीक्षक, लोणी काळभोर पोलिस ठाणे

आरोपींना पकडण्यात पोलिस हतबल
या गुन्ह्यातील मुख्य आरोपी पांडा राखपसरे हा अट्टल गुन्हेगार असून, त्याच्यावर लोणी काळभोर पोलिस ठाण्यात यापूर्वीही गंभीर स्वरूपाचे गुन्हे दाखल आहेत. परिसरात त्याने अवैध धंद्यांद्वारे दहशत निर्माण केली आहे. तो उघडपणे फिरत असूनही पोलिसांनी अटक केलेली नाही.