कोरेगावमूळ परिसरात बिबट्याचे दर्शन

उरुळी कांचन, ता. ३१: कोरेगावमूळ (ता. हवेली) परिसरातील कड वस्ती, भिडे वस्ती, दासवे वस्ती, शितोळे वस्ती या भागांमध्ये बिबट्याचे सातत्याने दर्शन होत असल्याने शेतकरी तसेच ग्रामस्थांमध्ये भीतीचे वातावरण आहे. यामुळे वनविभागाने तातडीने पिंजरा लावावा, अशी मागणी ग्रामस्थांच्या वतीने ग्रामपंचायत प्रशासनाने वन विभागाकडे निवेदनाद्वारे केली आहे.

बिबट्याने पशुधनावर हल्ला केल्यानंतर वन विभागाचे अधिकारी, कर्मचारी घटनास्थळी येतात व पंचनामे करतात, मात्र, नुकसानीचा मोबदला शेतकऱ्यांना लवकर मिळत नाही. या परिसरात बिबट्याचा वावर एक महिन्यापासून आहे. कड वस्ती, भिडे वस्ती, दासवे वस्ती, शितोळे वस्ती, इतर परिसरात देखील बिबट्याचा मुक्त संचार आहे. त्यामुळे येथील शेतकरी वर्ग व ग्रामस्थ भयभीत झाले आहेत. योग्य ती उपाययोजना करावी. तसेच तातडीने पिंजरा लावावा, असे निवेदनात नमूद केले आहे. तसेच परिसरातील नागरिकांच्या सुरक्षेसाठी वनविभागाने तातडीने पिंजरा लावावा, बिबट्याचा बंदोबस्त करावा आणि नुकसानभरपाईची कार्यवाही जलदगतीने करावी, अशी मागणी करण्यात आली आहे.
दरम्यान, लोकांच्या जनजागृतीसाठी व पशुधन संरक्षणासंदर्भात व बिबट्यापासून ते वन्य प्राण्यांपासून घ्यावयाची काळजी यासंदर्भात आम्ही कोरेगावमूळ या ठिकाणी जनजागृती करणार असल्याचे वन परिमंडल अधिकारी प्रमोद रासकर लोणी काळभोर वनरक्षक संभाजी गायकवाड यांनी म्हटले आहे.