लोणी काळभोरमध्ये सावकाराकडून महिलेला जातिवाचक शिवीगाळ

उरुळी कांचन, ता. १८ : खासगी सावकाराने पाच लाखांच्या मोबदल्यात २१ लाख रुपये व्याज घेऊन महिलेला जातिवाचक शिवीगाळ केल्याची घटना लोणी काळभोर (ता. हवेली) परिसरात २०२० ते २०२५ या कालावधीत घडली आहे. याप्रकरणी एका ४७ वर्षीय विवाहितेने लोणी काळभोर पोलिस ठाण्यात तक्रार दिली आहे. राहुल लक्ष्मण काळभोर (रा. तरवडी, रानमळा, लोणी काळभोर, ता. हवेली, पुणे) व विशाल विठ्ठल काळभोर (रा. सिद्राममळा, लोणी काळभोर, ता. हवेली) अशी गुन्हा दाखल करण्यात आलेल्या आरोपींची नावे आहेत.
पोलिसांनी दिलेल्या माहितीनुसार, फिर्यादी या लोणी काळभोर येथील रहिवासी असून त्या कुटुंब समवेत राहतात. त्यांना त्यांच्या दुकानाचे नूतनीकरण करायचे होते. याकरिता त्यांनी आरोपी राहुल लक्ष्मण काळभोर यांच्याकडून ५ लाख ८ हजार रुपये २०२० साली उसने घेतले होते. परंतु, आरोपीने ४ टक्के व्याजाने परतफेड करा असे सांगितले. फिर्यादी यांनी टप्प्याटप्प्याने २१ लाख रुपये व्याज स्वरूपात दिले आहेत. आरोपीने २१ लाख रुपये घेऊनसुद्धा फिर्यादी यांच्याकडे पैशाचा तगादा लावला. आणि त्यांच्या कुटुंबीयांना त्रास देऊन पैशांची मागणी करून दमदाटी केली. आरोपी काळभोर व त्याचा मित्र विशाल काळभोर हे दोघे फिर्यादी यांच्या शॉपवर ८ ऑगस्ट २०२५ रोजी आले. त्यांनी फिर्यादी यांच्या शॉपला येऊन त्यांना जातिवाचक शिवीगाळ केली. फिर्यादी यांचे पती मध्यस्थी करू लागले तेव्हा आरोपीने अश्लील बोलून फिर्यादी यांच्या स्त्री मनास लज्जा उत्पन्न होईल असे कृत्य केले.
..........