जिल्ह्यातील आठ हजार जनावरांची तपासणी

कात्रज, ता. ६ : पुणे जिल्हा दूध संघ म्हणजेच कात्रज डेअरीकडून जिल्हाभरात जनावरांसाठी मोफत आरोग्य शिबिर राबविले होते. जिल्ह्यात सात ते ३१ जुलै २०२५ पर्यंत ७८ गावांत राबविण्यात आलेल्या कार्यक्रमांत आठ हजार १५ जनावरांची मोफत तपासणी करण्यात आली. यामध्ये ६ हजार ७७७ गायींचा आणि १ हजार २३८ म्हैस जातीच्या जनावरांचा समावेश होता.

उपमुख्यमंत्री अजित पवार यांच्या वाढदिवसानिमित्त दूध उत्पादक शेतकऱ्यांच्या जनावरांसाठी या शिबिराचे आयोजन केले होते. शिबिरामध्ये दूध उत्पादकांच्या जनावरांची तपासणी करण्यात आली. त्यामध्ये जनावरांच्या आजाराचे निदान करत जंतमार व गोचीडमार औषधांचे मोफत वाटप करण्यात आले. शेतकऱ्यांसाठी संघाच्या विविध सेवांबाबत माहितीही देण्यात आली. यामध्ये प्रामुख्याने संघनिर्मित कात्रज पशुखाद्य, कडबा कुट्टी मशिन, मिल्किंग मशिन, मिनरल मिक्चर, चारा, बि-बियाणे, मुरघास बंग, कृत्रिम रेतन सुविधा, पशुवैद्यकीय औषधे, आयव्हीएफ सेवा, जंतनिर्मूलन, स्वच्छ दूध उत्पादन व सेंद्रिय खते याबाबत गावपातळीवर संघाची सभासद दूध संस्था व दूध उत्पादक शेतकऱ्यांच्या गोठ्यावर जाऊन माहिती दिली दिल्याची माहिती संघाचे अध्यक्ष स्वप्नील ढमढेरे यांनी दिली.

शिबिराचा लाभ दूध उत्पादन वाढीसाठी व जनावरांना हानिकारक असलेल्या जंत व गोचीड निर्मूलनासाठी झाला असल्याचे प्रतिपादन यासमयी संघाचे व्यवस्थापकीय संचालक मनोज लिमये यांनी केले. शिबिराचा दूध उत्पादक शेतकऱ्यांना फायदा व्हावा या उद्देशाने जिल्ह्यात तीन पथके तयार केली होती. पवार यांच्या ६५ व्या वाढदिवसानिमित्त ६५ दूध उत्पादक संस्थांच्या शेतकऱ्यांच्या जनावरांसाठी मोफत आरोग्य शिबिर घेण्याचा त्यांचा मानस होता व तो यशस्वीरीत्या पूर्ण झाल्याचेही ढमढेरे यांनी सांगितले.

सदर शिबिराला शेतकरी बांधवांनी मोठ्या प्रमाणात हजेरी लावून उस्फूर्त प्रतिसाद दिला व आपल्या जनावरांकरिता मोफत आरोग्य शिबिराचा लाभ घेतला आहे.

70559